Ish-kryeministri, Sali Berisha, i kërkoi Prokurorit të Përgjithshëm të hetojë denoncimet e bëra nga media mbi mospagesat e sigurimeve shoqërore për punonjësit e administratës publike.
Ndërsa e cilëson si një sistem skllavërie që vetë qeveria po vendos mbi shtetin shqiptar, Berisha thekson se ky është një krim i rëndë dhe një shkelje e qartë e Kushtetutës nga ana e kryeministrit.
“Mediat njoftojnë se 13 bashki të vendit dhe një seri institucionesh publike nuk kanë paguar sigurimet shoqërore për punonjësit e tyre duke i mbajtur ata në të zezë si skllevër të vërtetë.
Ky është një akt kriminal, antikushtetues në shtetin e Noriegës, që meriton ndëshkim ligjor shembullor.
Kjo është vepër e vjedhjes, shpërdorimit të buxhetit të shtetit direkt nga drejtuesit për përfitime personale.
Ligjet e vendit parashikojnë ndjekje penale për sipërmarrësit privatë që mbajne qoftë dhe dy punëtorë të pasiguruar, kurse në shtetin e Norieges, në sektorin buxhetor janë mijëra punonjës të pasiguruar.
Duke dënuar me ashpërsinë më të madhe sistemin e skllavërisë shtetëror, i bëj thirrje prokurorisë të vendosë menjëherë para ligjit këta drejtues të korruptuar”, shkruan Berisha në rrjetet sociale, duke publikuar edhe njësitë vendore që nuk kanë paguar kontributet shoqërore të punonjësve. /tesheshi.com/
