Ish-kryeministri Sali Berisha gjatë fjalës së mbajtur në Kuvend deklaroi se dështimi 27-vjeçar i politikës shqiptare ishte turizmi, për të cilin të gjitha qeveritë dështuan. Berisha tha se edhe në një rast kur një investitor erdhi për të ndërtuar një resort, pësoi 37 fraktura dhe u largua nga Shqipëria.
“Erdhi investitori për të ndërtuar resortin, që në vende të tjera i keni të llojeve të ndryshme. Por çfarë i ndodhi? Të gjithë e dimë, morri 37 fraktura dhe të gjithë e dimë kush ia dha”, tha Berisha.
Në vijim ai sqaroi se personalisht kurrë nuk ka folur kundër ardhjes së investitorëve të huaj, ndërsa shtoi se tashmë ata që i thonë të huajve mos hajdeni në Shqipëri janë ambasadat.
“Para dy muajsh erdhi një investitor dhe kishte dëshirë të kryente një investim madhor. Por kur i kërkoi ambasadës së vendit të tij një opinion, ata i thanë s´ke siguri, sepse kjo është pika kryesore që kërkojnë të huajt kur vijnë për investime, duan garanci dhe siguri”, tha Berisha.
Në vijim ai akuzoi, por jo me tonet e përdorura në legjislaturën e kaluar, kabinetin qeveritar për nivelin e lartë të korrupsionit dhe lidhjeve me krimin. Madje në këtë kuadër, Berisha përmendi Arben Ahmetajn dhe Ogerta Manastirliun.
“Lexoni raportin e DASH se çfarë thotë, ju mendoni se korrupsionin mund t´a zvogëlojë Pandeli Majko me thinjat që ka në kokë, por e keni gabim”, tha Berisha. Në këtë kuadër ai kërkoi miratimin e një ligji të plotë mbi konfliktin e interesit, si të vetmen mënyrë për të luftuar korrupsionin dhe prerë lidhjet e tij me qeverisë.
Në vijim ai shtoi se në sytë e deputetëve konstatoj se ka frikë dhe pasiguri të madhe.
“Rama duhet ta pranoj që mbajti një fjalim të ndryshëm nga ai katër viteve me parë, por i shoqëruar nga një panik i madh. Por nga vjen ky panik? Ky njeri me Kushtetutë në dorë, e di mirë se përveç Kushtetutës në ligje ekziston kushtetuta e moralit, e popullit, e fëmijëve që buron nga shpirti i tyre. Në atë kushtetutë ju jeni fitimtarë të dhunës më të mëdhenj të këtij vendi. Në atë kushtetutë morale ju vini këtu si nj pseudo mazhorancë e vërtetë.
Në atë kushtetutë morale ju jeni të ndëshkuar. Shqiptarët ua shndërruan fitoren ju si një dasmë pa nuse. Çfarë fitore është kjo kur provuesi themelor jetik për demokracinë, lirinë nuk u besua nga miliona shqiptarë që braktisën kutitë e votimit. Ti je i dyti pas Enver Hoxhës që u përçmove nga shqiptarët”, tha Berisha. /tesheshi.com/
