Kryedemokrati Sali Berisha ka paralajmëruar shkrirjen e SPAK-ut nëse vjen në pushtet, e thënë troç prej tij.
“Absolutisht ky institucion nuk do të ekzistojë(…)…Një institucion që është jashtë çdo kontrolli është një institucion që duhet të shuhet me çdo kusht”, tha ai. Po pse?
“Së pari, ky institucion nuk mund të kontrollonte kurrë gjykatësit. Që në momentin që kontrollon telefonat e gjykatësve specialë, ke krijuar një drejtësi që as Enveri dhe Hitleri nuk e kanë pasur. Si mund t’i japësh prokurorit kontrollin mbi gjykatësit tek të cilët çon dosjen? Merre fund që këtu, kaq. Ju, njerëz të medias, duhet ta denonconi këtë në mënyrën më të fuqishme,” tha Berisha.
Këtij qëndrimi komtravers iu përgjigj më pas Rama.
“Ata që duan ta kthejnë përmbys reformën janë ende përballë nesh me përbetimin publik se në 11 maj po u dhanë votën do ta shkrijnë SPAK-un”, tha Rama, duke vijuar: “Që kur erdha unë në këtë detyrë dhe deri më sot, ky popull ma ka dhënë besim 9 herë. Siguroj që në 11 maj do ma japë besimin për herë të 10-të dhe me rezultat më të mirë se dhjetë herët e kaluara. Pse e kam unë këtë besim? E kam sepse ky popull nuk mendon që unë duhet të jap dorëheqjen, sepse udhëhoqa pavarësimin e drejtësisë dhe i hapa rrugës goditjeve në nivele të larta, gjë që nuk kishte ndodhur kurrë që nga viti 1912. Populli kërkoi pikërisht këtë nga reforma, fundin e pandëshkueshmërisë dhe fundin e një drejtësie ku ligji kishte fuqi vetëm mbi më të dobëtin”. /tesheshi.com/
