Atmosferës së acaruar politike në Kosovë i është shtuar dhe arrestimi i një personi me mbiemrin Boletini, i cili përcolli një tekst kërcënues në rrjete sociale, adresuar presidentit Thaçi.
Duke publikuar një foto me dy armë, shtetasi Kujtim Boletini, për të cilin thuhet se është banor i pjesës veriore, shkroi:
“Sot i zhdrypa prej tavani se në kuvend po flitet për ndarjen e Kosovës nga Hashim Broja. Le ta dijë Hashim Broja a kushdo qoftë ai se ende jemi gjallë pjesa e Veriut. Nuk e lejojmë ndarjen o Hashim Broja, dije se gjumin, gjumë s’ta le me bo”.
Orë më vonë, Policia e Kosovës njoftoi se ka arrestuar 40 vjeçarin me iniciale K.P nga rajoni i Mitrovicës.
“Drejtoria për Hetimin e Krimeve të Rënda e PK-së, pas pranimit të një informacioni se përmes rrjeteve sociale është kërcënuar Presidenti i Republikës së Kosovës, me datën 26.03.2020 zyrtarët policorë në bashkëpunim me organet e drejtësisë kanë ndërmarr veprimet e menjëhershme hetimore.
Me vendim të prokurorit kompetent personi i dyshuar pas intervistimit është dërguar në mbajtje për dyzet e tetë (48) orë.”
Rënia e qeverisë “Kurti” ka bërë që si politika, ashtu dhe rrjetet sociale të Kosovës të ziejnë nga komentet deri me natyrë luftarake.
Një pjesë e opinionit kosovar ka bindjen se pas rrëzimit të Albin Kurtit qëndron Thaçi me SHBA nga pas, të cilët duan të ndajnë Kosovën. /tesheshi.com/
