Qeveria në Beograd thotë se do të nisë nga e hëna zbatimin e marrëveshjeve të Brukselit, me kërkesën për krijimin e një kompanie telefonike, ndërsa marrëveshjet e mëparshme të dialogut janë zvarritur për muaj me radhë.
Shefi i Zyrës për Kosovën, Marko Gjuriç në qeverinë e Beogradit njoftoi se prej së hënës do të ndërmerren hapat e parë për zbatimin e marrëveshjeve të Brukselit. Në një konferencë shtypi, ai njoftoi se do të dorëzohet kërkesa dhe dokumentacioni plotësues për krijimin e një kompanie telekomi në Kosovë në shërbim të serbëve që jetojnë aty.
Gjuriç ka përcaktuar një afat kohor prej katër muajsh për hartimin e statusit të Asocacionit të komunave serbe.
Komentet e tij vijnë pas një takimi në Beograd me krerët e dhjetë komunave me shumicë serbe, deputetët serbë në Kuvendin e Kosovës dhe përfaqësuesit e Listës serbe.
Ndërkohë, komunat me shumicë serbe, pjesë e Asocacionit do të vizitohen nga kryeministri serb, Aleksandar Vuçiç. Ky i fundit ka paralajmëruar vizitën në shtator. /tesheshi.com/
