Beogradi, “stop” Jahjagës: nuk e lejon të marrë pjesë në festivalin “Mirëdita, dobar dan!”

Ndërsa pothuajse çdo ditë në Kosovë hynë zyrtarë serbë të cilët i referohen si “Kosovo e Metohije”, dhe nuk pengohen nga institucionet, në anët tjetër Serbia nuk lejon hyrjen e zyrtarëve kosovarë në shtetin e tyre. Rasti më i fundit është ndalimi që ju bë ish-presidentes Atifete Jahjaga të marrë pjesë në festivalin “Mirëdita, dobar dan!”, që do mbahet në Beograd.

Jahjaga pas ndalimit ka bërë të ditur se përgatitjet për vizita e saj janë bërë në përputhje me marrëveshjen e Brukselit, por që Beogradi nuk po e respekton, duke thënë se shteti serb po vazhdon politikën e viteve ’90,

“Unë sot do të duhej të isha në Beograd për promovim të librit ‘Unë dua të dëgjohem’ në kuadër të festivalit ‘Mirëdita, dobar dan!’, ku u ftova të mbaj fjalim për viktimat e dhunës seksuale gjatë luftës në Kosovë. Hyrja ime në shtetin e Serbisë u pamundësua me një arsyetim absurd. Përgatitjet për vizitën janë bërë në përputhje me Marrëveshjen e Brukselit për vizita të zyrtarëve të lartë. Autoritetet e Kosovës i kanë njoftuar me kohë dhe me përpikëri autoritetet e Serbisë, siç është e paraparë me marrëveshje, por zyrtarët në Beograd kanë dështuar t’i përmbahen kësaj marrëveshjeje, duke e shkelur atë me qëllim që të ndalojnë vizitën time”, ka shkruar Jahjaga.

Ish-presidentja ka bërë të ditur më te se zyra e saj dhe organizatorët e festivalit janë në komunikim të vazhdueshëm për të siguruar pjesëmarrjen e saj në këtë festival.

“Por dua të shpreh respektin tim për organizatorët e festivalit, një grup të rinjve dhe aktivistëve që nuk do të lejojnë që e ardhmja e tyre dhe e tërë rajonit të mbahet peng nga këta udhëheqës që duan ta fshehin të vërtetën. E vërteta nuk njeh kufij. Me bindjen se pranimi i së vërtetës mbi krimet e luftës në Kosovë është e vetmja mënyrë që shoqëritë e dy vendeve të ecin përpara”, ka shkruar Jahjaga.

Ndalimi i Beogradit për vizitën e Jahjagës ka nervozuar edhe ministren në detyrë Edita Tahiri, e cila thotë se me këtë akt refuzimi Serbia ka shkelur marrëveshjen e Brukselit për lirinë e lëvizjes dhe atë për vizita zyrtare midis dy shteteve.

Tahiri më tej në reagimin e saj thotë se “Serbia tregon qartë se Serbia nuk është e gatshme të përballet me të kaluarën e saj agresore dhe gjenocidale ndaj shqiptarëve dhe kjo po ashtu tregon se ata nuk janë të gatshëm për paqe, drejtësi dhe marrëdhënie fqinjësore midis dy shteteve”.

Ajo bën të ditur se do të kërkojë nga Bashkimi Evropian që të ndërhyjë në zgjidhjen e kësaj çështjeje sa më parë që të jetë e mundur si dhe të mundësohet kjo vizitë që është në funksion të paqes dhe fqinjësisë mes dy shteteve.