Kërcënimi i Listës Serbe drejtuar institucioneve kosovare se do ta formojnë njëanshëm Asociacionin e Komunave me shumicës serbe më datë 20 prill, nuk do të konkretizohet. Këtë e ka konfirmuar presidenti serb, Aleksandër Vuçiç duke thënë se përfaqësuesit e serbëve të Kosovës do ta respektojnë afatin e përcaktuar nga Bashkimi Evropian.
“Serbët s’do ta formojnë Asociacionin as nesër, e as pasnesër. Kemi pritur pesë vjet, do të presim edhe këta tre muaj, që askush të mos i akuzojë serbët se po i shkelin marrëveshjet dhe dakordimet ndërkombëtare. Kanë thënë se për tre muaj e gjysmë do të dalin me statutin e Asociacionit. Serbia do të presë edhe tre muaj e gjysmë, por ju them tani, nuk presim se kjo do të ndodhë”, ka thënë ai.
Ky reagim i Presidentit serb vjen ndërsa ai bëhet gati të shpalosë planin për Kosovën, një projekt që do përcaktojë raportet e së ardhmes mes dy vendeve. Vuçiç po maturon dhe përgatitë opinionin pubik para prezantimit, ku nuk po mungojnë dhe sulmet para se ta paraqesë, siç ishte ai i ish-ministrit të Jashtëm Vuk Jeremiç. /tesheshi.com/
