Nga redaksia
“Gjithmonë në mbrojtje të popullatës” – kështu shkruhet në disa billboard-te të vendosura ditë më parë në veri të Mitrovicës, në të cilat madhërohet “Civilna Zastita”, e njohur ndryshe si “Mbrojtja Civile serbe”, një stukturë gjysëmpolicore dhe gjysëmushtarake e cila i ka bërë karshillëk vitet e fundit deri në sfidim të hapur strukturave të rendit në Kosovë.
Ajo pra ka qenë një mishërim i shtetit paralel serb në veri të Kosovës, që, sipas një prej marrëveshjeve të Brukselit mes Prishtinës dhe Beogradit duhej të shkrihej tërësisht, ndërsa të 483 pjesëtarët e saj të integroheshin në institucionet e Kosovës, kryesisht në ato të sigurisë dhe doganave.
Por a ka ndodhur vërtet kështu?
Në dukje po, por kur dihet fakti se serbët nuk dorëzohen dhe aq kollaj dhe që e kanë kredo kombëtare ta luftojnë me çdo mjet shtetin e Kosovës, vështirë të besohet se marrëveshja që Beogradi ka firmosur të jetë zbatuar në terren ashtu siç është rënë dakort.
Një burim kofidencial nga brenda institucioneve financiare ku qarkullojnë xhirollogaritë nga Beogradi, i tha redaksisë së tesheshi.com se ata tashmë marrin dy paga: një nga buxheti i Kosovës, në institucionet e së cilës janë punësuar sipas marrëveshjes së Brukselit, e një tjetër nga Beogradi si vijues të misionit të të qënit pjesëtar të “Civilna Zastita”-s, por duke ekzistuar legalisht si të tillë. Pra, de fakto, “Mbrojtja Civile serbe” vijon të jetë aktive, aq më tepër që tashmë janë dhe brenda institucioneve të Kosoës.
“Serbia ka qenë shumë e interesuar që një pjesë të kësaj strukture paralele ta përfshijë në kuadër të institucioneve të Kosovës, me qëllim që këto institucione t’i kontrollojnë tashmë nga brenda, e jo që këta pjesëtarë të integrohen, pra siç është rënë dakort në Bruksel”, tha një tjetër burimi në kushte anonimiteti, që po ashtu ka siguruar më tej se ata marrin dy paga.
“Nuk e di se si është e munduar që qeveria e Kosovës të heshtë për një veprim të tillë që është duke e bërë qeveria e Serbisë, pra që pjesëtarëve të “Mbrojtjes Civile serbe” t’ju japin nga dy paga, kur një gjë e tillë ndalohet me marrëveshjen e Brukselit”, ka shtuar ai.
Ndërkohë, këtë e ka konfirmuar dhe një burim shtesë nga vetë brenda strukturës së “Civlina Zastita”-s.
“Unë nuk dua të ankohen. Derisa Serbia na jep paratë, unë do t’i marr me gjithë dëshirë e do të punojë për shtetin e Serbisë e jo për Kosovën”, ka thënë ai, duke mos e patur problem të saktësojë se pagat i marrin në llogaritë e tyre që i kanë të hapura në “Komercialna Banka”.
Sipas tij, udhëheqësit, komandantët e “Civilna Zastita”-s, paguhen deri në rreth 570 euro në muaj nga Beogradi.
Ndërkohë ai thotë se qeveria e Serbisë ka mundur dhe t’u sigurojë atyre punët më të mira në institucionet e Kosovës.
“Komandantë kanë doganat e Kosovës në veri, ndërsa pjesëtarët e thjeshtë janë futur në punë të tjera, më pak rëndësishme dhe ku paga janë shumë të vogla”, ka shtuar burimi.
Kështu pra, e keqja e strukturave paralele serbe, ku veçohet “Civilna Zastita”, tashmë është zgjeruar më tepër, pasi ata janë dhe në rolin e “Kalit të Trojës” për institucionet e shtetit të Kosovës, duke i rrjepur buxhetit të shqiptarëve edhe nga një pagë me tepër, pa llogaritur luftën e përbetuar ndaj tyre, qoftë dhe pa armë. /tesheshi.com/
