Po shoqërohet me tensione të larta një takim që zhvillohet nesër në Novi Pazar. Pritet të jetë një takim i zgjeruar panrajonal i Partisë së Aksionit Demokratike, e cila është forca politike që grumbullon dhe mbron të drejtat e myslimanëve në Bosnjë, por edhe në hapësirat e ish-Jugosllavisë.
Partia e Aksionit Demokratik në krahinën e Sanxhakut, e cila është shumicë në të gjitha organet e pushtetit vendor, do të mbajë një takim të madh ku ka ftuar përfaqësuesit e PAK të Bosnjës, Kosovës, Kroacisë, Maqedonisë dhe Malit të Zi.
“Ylli” i këtij eventi është pikërisht kreu i Partisë së Aksionit Demokratik të Bosnjë-Hercegovinës dhe njëkohësish anëtar i Presidencës kolektive, Bekir Izetbegoviç.
Por ende pa u zhvilluar takimi, qarqet politike dhe mediatike serbe po provokojnë një incident diplomatik.
Gazeta serbe “Veçernie Novosti”, shkruan se “Izetbegoviç nuk ka njoftuar Beogradin për vizitën e tij në Sanxhak”, ndërkohë kur Sarajeva dhe Beogradi kanë një regjim kalimi pa viza, pasi Serbia i ka njohur shtetësinë e saj thuajse të gjithë serbëve të Bosnjës.
Izetbegoviç, aktualisht ka radhën e rotacionit të drejtimit të Bosnjës dhe Beogradi ka nisur akuzat se ai synon një skandal diplomatik.
Myslimanët e Sanxhakut kanë kërkuar prej kohësh nga Beogradi që të respektohen më shumë liritë politike të popullatës boshnjake.
Në festën e Bajramit të Madh, në Novi Pazar u krye një akt vandal pasi u shkatërruan varrezat myslimane të qytetit.
Ndërkaq, televizioni B92 thekson në faqen e tij online se disa qarqe politike në Beograd duan të shkaktojnë një incident diplomatik në mënyrë që të prishin presidencën e Bekir Izetbegoviçit.
Kryebashkiaku i Novi Pazarit, Nihat Bisevaç ka ftuar Izetbegoviçin si mysafirin më të rëndësishëm të samitit të Partisë së Aksionit Demokratik.
Agjencia serbe Beta, thekson se vizita e Presidentit të Bosnjë-Hercegovinës do të jetë e shkurtër dhe e natyrës protokollare.
Izetbegoviç do të marrë pjesë në sesionin ceremonial të Këshillit Bosnjak të Serbisë (BNV), i cili është një forum i njëjtë me atë të shqiptarëve të Luginës së Preshevës që udhëhiqet nga Jonuz Musliu./tesheshi.com/
