Ndryshe nga një pjesë e opinionit shqiptar, i cili sheh “djallin” te Shengeni rajonal, në Serbi shohin “engjëllin”.
Qeveria serbe njoftoi projektet kryesore dhe reformat për pesë vitet e ardhshme, me investime prej rreth 14 miliardë eurosh, rritje të pagave dhe pensioneve, dhe investime prej 700 milion eurosh për të nxitur rritjen demografike dhe për të qëndruar të rinjtë në vend.
Dyshja Brnabiç-Vuçiç, e para kryeministre dhe e i dyti president, theksuan integrimin rajonal, thellimin dhe forcimin e tregut financiar dhe ndërmarrjeve publike, ekonominë e qëndrueshme, reformën në arsim, investimet në energji dhe infrastrukturë, të gjitha në funksion të inkurajimit të të rinjve që të mbeten në Serbi.
E në këtë kuadër, Brnabiç vlerësoi të ashtuquajturin “mini Schengen”, që sipas saj do të “mundësonte hyrjen në një treg më të madh, zvogëlimin e kostove të biznesit, rritjen e konkurrencës”.
“Zbatimi i plotë i ‘mini Schengen’-it mund të çojë në një rritje ekonomike prej 0,5 deri në 0,7 përqind, por është gjithashtu e rëndësishme që ne të reformojmë institucionet tona për të inkurajuar eksportuesit”, tha Brnabiç, duke sugjeruar nevojën për” thellimin e tregut financiar duke krijuar një klime më liberale që do të fusë më shumë para në ekonominë e Serbisë “.
Nën këtë frymë optimizmi,Vuçiç tha se në fund të vitit 2025, paga mesatare në Serbi do të jetë 900 euro dhe pensioni mesatar midis 430 dhe 440 euro”. /tesheshi.com/
.
