Serbia ka bërë tjetër hap të rëndë në nisjen e punës së Gjykatës Speciale. Ajo ka publikuar një raport ku do të akuzojë shqiptarët e Kosovës, në veçanti UÇK-në, për masakra dhe shkatërrim të pronës.
Serbia po krijon një realitet virtual duke e kthyer kombin e saj në një nga më të persekutuarit e shekullit. Pasi kreu në ish-Jugosllavi genocidin më të tmerrshëm pas Luftës së Dytë Botërore, ajo sot ka përkujtuar atë që e quan “masakrën e marsit”. Pra çlirimin e Kosovës, Beogradi e konsideron si kohën kur ka ndodhur “eksodi i madh”.
Qeveria serbe ka botuar një raport ku thekson se “për 12 vjet, nga Kosova u dëbuan 4,012 serbë, ku shumica e tyre ende nuk janë kthyer në shtëpitë e tyre”.
Duke përmendur marsin e vitit 1999, raporti thekson se “në një valë të dhunës në Kosovë dhe Metohi, u vranë 19 persona, tetë prej tyre serbë, ndërkohë që 11 shqiptarë janë vrarë në një përballje me anëtarët ndërkombëtarë të forcave të sigurisë. Janë plagosur 170 serbë dhe dhjetra e anëtarë të forcave ndërkombëtare të cilët u përleshën me serbë dhe shqiptarët që mbrojnë pronën e tyre.Janë shkatërruar rreth 800 shtëpi serbe dhe 35 ndërtesa fetare u dogjën, duke përfshirë edhe 18 monumente kulturore, përfshirë Kishën e Zojës në Prizren.
Ky tempull është një nga monumentet më përfaqësuese të Serbisë mesjetare, në qendër të Kishës Episkopale serbe që ishte e kohës së mbretit Millutin (1282-1321)”.
Sipas raportit, prokurorët ndërkombëtarë po përpunojnë dhe hetojnë shtatë raste të shkatërrimit të kishave.
Dalibor Jevtiç, një nga ministrat serbë në qeverinë e Isa Mustafës theksoi se përveç dëbimit, serbët e Kosovës pësojnë çdo ditë një presion nga shqiptarët.
Jevtiç në një deklaratë për Tanjug, tha se “është ende e paqartë se pse askush nuk reagoi për masakrën që ndodhi”.
Përgatiti: Ylli Pata – /tesheshi.com/
