Autoritete në Serbi iu kanë përgjigjur zyrtarisht organeve të Kosovës së zëvendëskryeministri dhe ministri Jashtëm i Kosovës Hashim Thaçi do të arrestohet nëse më 24 prill shkon në Beograd, transmeton Beta.
“Shteti në rast të ardhjes së ministrit të jashtëm të Kosovës Hashim Thaçi në Beograd, do të veprojë sipas ligjit”, ka deklaruar sot kryeministri serb Aleksandar Vuçiç. Për këtë theksohet se Prishtina ka marrë njoftimin zyrtar.
Siç theksohet, Thaçi do të arrestohet sepse kundër tij ekziston aktgjykimi i plotfuqishëm e në bazë të tij edhe fletë arresti.
Në vitin 1997 Thaçi nga gjykata serbe ishte dënuar me 10 vjet burgim për shkak të “terrorizmit”.
Hashim Thaçi ishte ftuar të merrte pjesë në një konferencë të një OJQ-je në Beograd.
Në lidhje me këtë çështje ka reaguar edhe Bashkimi Evropian, ku ka deklaruar se vizitat reciproke të zyrtarëve të Kosovës dhe të Serbisë janë diskutuar në Bruksel dhe se kjo i shërben normalizimi të marrëdhënieve ndërmjet dy vendeve.
Për këtë arsye janë hapur edhe zyrat ndërlidhëse në Prishtinë dhe në Beograd.
Kujtojmë se zyrtarët më të lartë të Qeverisë së Serbisë vijnë shpesh në Kosovë për festa religjioze, për të bërë ndonjë përurim dhe për të vizituar komunitetin serbë në Kosovë. Ata këto vizita i realizojnë pa asnjë problem dhe me pëlqimin e autoriteteve të Kosovës, edhe pse disa prej këtyre zyrtarëve kanë pasur funksione edhe në kohën e Millosheviçit.
Ndërsa, Ardian Arifaj, këshilltar i zëvendëskryeministrit të Kosovës, Hashim Thaçi, ka thënë për Telegrafin se Qeveria e Kosovës nuk ka marrë ende ndonjë njoftim zyrtar, nga ana e Qeverisë së Serbisë, se me të arritur të Thaçit në Serbi, ky i fundit do të arrestohet.
Ai ka sqaruar se ata e kanë njoftuar zyrën ndërlidhëse se zëvendëskryeministri Hashim Thaçi do të udhëtojë drejt Serbisë.
“Ne kemi dërguar kërkesë, që ata ta organizojnë vizitën e Thaçit në Beograd”, theksuar Arifaj.
