Refuzimi i Bashkimit Europian për të miratuar avancimin e Serbisë në BE ka provokuar një seri reagimesh të nxehta dhe histerike të qarqeve politike e mediatike serbe. Duke mos e përmendur Kosovën si shkak, të gjithë kanë sulmuar Turqinë, e cila është një hap drejt anëtarësimit në BE.
Ivica Daçiç, ministri i jashtëm në qeverinë kujdestare të Serbisë, sulmoi Brukselin se ka avancuar marrëdhëniet me Turqinë dhe Malin e Zi, ndërsa ka refuzuar Serbinë.
Zyrtarisht rrëzimi i Serbisë erdhi pas refuzimit të dhënies së konsensusit nga anëtari i BE-së Kroacia, e cila ka kërkuar në mënyrë të qartë dhe të prerë që Beogradi të ndryshojë mënyrën e marrëdhënieve me fqinjët, duke njohur Kosovën dhe duke pranuar publikisht gjenocidin që Serbia ka kryer në vitet 90 në vendet e ish-Jugosllavisë.
Këshilli i Sigurimit të OKB-së nuk votoi dot vitin e kaluar një rezolutë mbi gjenocidin serb në Srebrenicë, pasi ambasadorët e Rusisë dhe Kinës kanë votuar kundër pas kërkesës zyrtare të Serbisë, e cila nuk e quan gjenocid.
Pas kësaj, Kroacia e cilësoi të padenjë që një shtet i tillë të bëhet anëtar i BE-së. Por ministri i jashtëm serb ka shpërthyer kundër kroatëve duke i cilësuar “fashistë”.
“Kroatët kanë kryer gjenocid në regjimin e tyre të ustashëve ndërsa Serbia ka ndjekur një politikë të paqtimit rajonal”, tha Daçiç për televizionin serb.
Ndërkaq, Ljubinka Milinçiç, kryeredaktorja e edicionit serb të portalit rus të lajmeve “Spitnik”, akuzoi elitën serbe se ka qenë fajtore ngaqë ka mbajtur një qëndrim vasal ndaj Brukselit.
Milinçiç drejton jo thjesht një ent informativ normal, por një gjigant që megafinancohet direkt nga Kremlini. Qëndrimi i saj nuk përbën një opinion vetëm gazetaresk, por një deduksion që vjen nga Moska.
Milinçiç tha se “Brukseli e do Serbinë një vend të vogël që nuk mund të mbijetojë e vetme asnjë moment. Ne bëmë gjithçka që na u kërkua ndërsa ata u hapën dyert turqve”.
Ndërkaq duke folur nëse kanë ndikuar marrëdhëniet me Moskën, Milinçiç theksoi se Serbia duhet të mbajë një qëndrim të qatë siç e mban Rusia.
“Marrëdhëniet me Rusinë nuk mund të jenë më të mira se kaq, ata janë konstante dhe në ngritje, edhe presidenti edhe kryeministri kanë vizituar Moskën së fundmi. Vladimir Putin ka theksuar se miqësia mes popujve duhet reflektuar në qeveri”, tha Milinçiç.
Marrë nga B92- /tesheshi.com/
Përgatiti Y.Pata
