Partia Liberale Serbe njofton se në vendkalimin kufitar Dheu i Bardhë është ndaluar anëtari i kësaj partie, njëherësh këshilltar i kryeministrit të Ramush Haradinaj, Sërgjan Jovanoviç.
Sipas një komunikate nga SLS-ja, thuhet se Policia e Serbisë e ka ndaluar Jovanoviçin me argumentimin se “dikush duhet të flas me të”.
SLS thotë se nuk i kupton “këto ndalesa dhe maltrajtime” dhe se për të pestën herë kërkon përgjigje dhe sqarim nga ana e presidentit të Serbisë, kryeministres dhe shefit të Shërbimit Informativ, se pse përfaqësues të lartë të kësaj partie po ndalohen në territorin e Serbisë.
“Po ashtu për të pestën herë presim reagim konkret nga Bashkimi Evropian dhe të gjitha institucionet vendore dhe ndërkombëtare me rastin e këtyre maltretimeve që po u bëhen anëtarëve të SLS-së”, thuhet në një deklaratë.
Ka reaguar dhe vetë kryeministri Haradinaj, duke u shprehur se ky është një agresion:
“Shpreh shqetësimin për ndalimin e këshilltarit tim Srdjan Jovanoviç nga autoritetet e sigurisë dhe inteligjencës serbe. Ky ndalim, që nuk është i pari i kësaj natyre, edhe njëherë dëshmon qartë se metodat e frikësimit që përdoren nga autoritetet serbe, janë një shenjë agresioni, karshi qytetarëve të Kosovës.
Ju bëjmë thirrje autoriteteve të Brukselit zyrtar që të reflektojnë dhe adresojnë, sjelljen e autoriteteve serbe ndaj qytetarëve të Kosovës.
Ky agresion, nuk i ndihmon normalizimit të marrëdhënieve mes shteteve tona”, shkroi Haradinaj. /tesheshi.com/
