Beogradi firmos fundin e Jabllanoviqëve në Kosovë: emëron Sllavko Simiq në krye të Listës Serbe

Sllavko Simiq – ky është kryesues i ri i Listës Serbe për Kosovën, duke zëvëndësuar kështu Aleksandar Jabllanoviqin.

Simiq, është njëherësh dhe deputet e shefi i grupit parlamentar të Listës në Parlamentin e Kosovës, e që nga sot edhe Kryetar i Listës Serbe.

Akti zyrtar i emërimit të tij u krye të premten në Beograd në prani të kryeministrit Aleksandar Vuçiq dhe shefit të Zyrës për Kosovën, Marko Gjuriq.

Aleksandar Jabllanoviq, ish-ministër për Kthim dhe Komunitete në qeverinë e Kosovës, kohë më parë u  shkarkua nga kryeministri Isa Mustafa, pas trazirave që pasuan deklaratat e tij fyese kundrejt nënave gjakovare dhe ndaj të vrarëve në Gjakovë gjatë luftës.

Po ashtu,  qeveria e Serbisë ditë më parë shkarkoi nga detyra edhe babain e tij, Dragan Jabllanoviq, nga detyra e kryetarit të Kkmunës së Leposaviqit.

Një burim i afërt me këto lëvizje dhe këto zhvillime, i tha portalit tesheshi.com, se kjo është një luftë e hapur e qeverisë së Serbisë ndaj Jabllanoviqëve, e cila nuk ka asnjë qëllim politik, por vetëm qëllime kriminale dhe korruptive.

Sipas burimit, babë e bir nuk kanë përfillur urdhërat e ardhura nga kapoja i krimit të veriut të Kosovës, Zvonko Veselinoviq, i cili dikton se kujt duhet t’iu jepen tenderët e kujt jo.

“Veselinoviq, tani është njeriu më i afërt i kryeministrit të Serbisë, Aleksandar Vuçiqit, ku nga ky i fundit dhe qeveria e tij, ai ka fituar tender qindra miliona euro për ndërtimin e korridorit të 10 dhe 11”, i ka thënë burimi i portalit tesheshi.com. /tesheshi.com/