Balotazhi i zgjedhjeve paraprake së të majtës franceze nxori fitues një ditë më parë një ish-ministër arsimi. Benoit Hamon do të jetë kandidati i socialistëve francezë në zgjedhjet e ardhshme presidenciale.
Aq e madhe është pakënaqësia me të majtën qeverisëse në Francë, sa Francois Hollande nuk pranoi të rikandidonte, ndërsa ish-kryeministri Manuel Valls u mund dje me lehtësi në raundin e dytë të zgjedhjeve paraprake.
Hamon bëri të parën lëvizje të dëshpëruar dje pas fitores, duke kërkuar bashkimin e së majtës.
“Pavarësisht dallimeve, forcat e së majtës nuk kanë qenë kurrë kaq pranë sa u përket ideve. Le të bashkohemi.”
Me zgjedhjen e Benoit Hamon-it si kandidat i socialistëve ka marrë trajtë dhe panorama e atyre që do ta synojnë presidencën franceze në zgjedhjet e prillit dhe majit.
Francois Fillon, kandidati i të djathtëve, republikanëve, Marine Le Pen, përfaqësuese e ekstremit të djathtë, dhe centristi Emmanuel Macron janë tre emrat që do të garojnë përkrah Hamon-it.
Fillon shihet si njeriu më i mundshëm për t’i fituar zgjedhjet presidenciale, por skandali me të shoqen, që pretendohet të jetë paguar me rreth gjysmëmilion euro në tetë vite për një punë të rreme si ndihmëse parlamentare, ia ka lëkundur pozitat.
Në çdo rast, anketimet i japin fare pak mundësi kandidatit socialist që të kalojë në balotazhin e 7 majit. Një sondazh i bërë i njohur të dielën i jep vetëm 13 për qind të votave Benoit Hamon-it në raundin e parë të zgjedhjeve presidenciale, më 23 prill. Ndërsa vetëm dy kandidatë shkojnë në balotazh, Hamon vihet pas Marine Le Pen-it, me 25 për qind, Francois Fillon-it, me 21 për qind, dhe Emmanuel Macron-it, me 20 për qind. /tesheshi.com/
