Trajneri spanjoll që në fillim të vitit u shkarkua nga puna si trajner i Realit të Madridit mund të rikthehet në Premier League. Benitez pritet që në orët e ardhshme të ulet në stolin e Newcastle-it.
Steve McClaren, drejtuesi teknik aktual i ekipit anglez, ka drejtuar sot seancën stërvitore të Newcastle-it, por të gjithë janë në pritje të shkarkimit të tij.
Sipas radios spanjolle Cadena Copa, Benitez ka nënshkruar një kontratë trevjeçare për t’u bërë trajner i Newcastle-it para përfundimit të sezonit. Për të marrë drejtimin e ekipit që po vuan këtë sezon janë përmendur si kandidatë dhe David Moyes dhe Brendan Rogers, por spanjolli ngjan të ketë më shumë mundësi që të emërohet në krye të Newcastle-it.
Ekipi anglez gjendet në vend të parafundit në klasifikimin e kampionatit anglez, me 16 humbje në 28 takime, dhe është shumë pranë rënies një kategori më poshtë.
Benitez ka drejtuar për shumë vite Liverpool-in, skuadrën me të cilën fitoi dhe Champions League-n, e po ashtu ka kaluar një periudhë të shkurtër kohore dhe te Chelsea. /tesheshi.com/
