Vatikani njoftoi vdekjen e ish-Papës Benedikti XVI.
Vdekjen e tij e ka bërë të ditur drejtori i Zyrës së Shtypit të Selisë së Shenjtë, Matteo Bruni.
“Me keqardhje ju informoj se Papa Emeritus Benedikti XVI ra ‘në gjumë’ sot në orën 9:34 në Manastirin Mater Ecclesiae në Vatikan”, tha zëdhënësi, duke sqaruar se do të jepen detaje të mëtejshme.
Papa Benedikti XVI tronditi Kishën Katolike kur njoftoi dorëheqjen e tij në vitin 2013.
Që atëherë ai jetoi në një ish-manastir në Vatikan. Benedikti, Papa i parë gjerman në 1000 vjet, u zgjodh më 19 prill 2005, për të pasuar Papa Gjon Palin II shumë popullor, i cili qëndroi në krye të kishës katolike romake për 27 vjet.
Benedikti e shpalli synimin e tij për të dhënë dorëheqjen më 11 shkurt 2013. Ai deklaroi se nuk kishte më forcë fizike dhe mendore për të udhëhequr kishën.
Më 28 shkurt të të njëjtit vit, ai dha dorëheqjen zyrtarisht dhe u zhvendos përkohësisht në rezidencën verore papale, në jug të Romës, ndërsa kardinalët nga e gjithë bota u mblodhën në Romë për të zgjedhur pasardhësin e tij. Françesku, Papa i parë nga Amerika Latine, u zgjodh pasardhës i tij më 13 mars 2013. /tesheshi.com/
