Republikanët do të kenë një kandidat më pak në fushatën e tyre të brendshme për të nxjerrë pretenduesin për president të SHBA-ve. Ben Carson ka lajmëruar zyrtarisht tërheqjen nga gara pas rezultateve zhgënjyese në votimet e fundit paraprake.
Carson, që nuk ia doli të shpallej fitues në ndonjë shtet në votimet paraprake, e pati paralajmëruar dorëheqjen që të mërkurën, kur deklaroi se nuk shihte “përpara një udhë politike”.
Fushata e tij u dëmtua rëndë nga pikëpyetjet mbi të shkuarën personale dhe nga paraqitja e dobët në trajtimin e çështjeve të jashtme.
“Ka shumë njerëz që më duan, e ata thjesht nuk do të votojnë për mua,” tha Carson në Konferencën e Aksionit Politik Konservator.
Ai nuk bëri të ditur se kë do të mbështeste prej kandidatëve republikanë në garë, veçse nuk ngurroi të thoshte se do të vijonte të ishte i përfshirë fort në përpjekjen për ta shpëtuar vendin.
Te republikanët, më i votuari deri tani në garën për të përcaktuar emrin që do të kandidojë për president është Donald Trump. Dy prej rivalëve të tij janë Ted Cruz dhe Marco Rubio. /tesheshi.com/
