Deputeti socialist Ben Blushi akuzoi mazhorancën dhe opozitën se kanë sjellë në politikë njerëz “të hurit dhe të litarit” që i kanë kriminalizuar institucionet.
Ai tha se po u japim një model shumë të shëmtuar të rinjve, atë të të fortit. Sipas Blushit ky është Parlamenti më i dobët që ka pasur
Shqipëria dhe gjithë faji sipas tij është i Ramës. “Do doja mos të isha sot në këtë parlament, edhe padyshim do doja që ky Kuvend mos kishte detyrimin të votonte një ligj kundër vetes.
Kjo do ishte e lehtë nëse këtu s’do ishin futur njerëz me të shkuar kriminale, të cilët na detyruan të votojnë edhe ata kundër vetes.
Jemi parlamenti më i shëmtuar në Evropë, që merr përsipër vetë të pranojë se këtu ka kriminelë dhe nëse s’do ishte për presionin ndërkombëtar, ky ligj s’do miratohej as sot as mot. A fituan ata me votë të pavarur? A konukrruan me një platformë ekonomike? A propozuan taksa më të ulëta?
Shëndetësi falas? Në fakt asgjë. Kush i futi ata në parlament? Dhe kjo është çështja që diskutojmë, kush, për cfarë arsyesh?
Sot është dita për të gjithë ne që pranuam të bashkëjetojmë me këtë Parlament të kërkojmë ndjesë…dhe kjo damkë që kemi marrë ne si parlament s’do t’i ndahet këtij Kuvendi për dekada të tëra. Përgjegjësia është personale, e atyre që i sollën, zbukuruan, parfumosën, lyen me make up politik për të na detyruar t’i pranojmë.
Këta njerëz u kthyen në model për shoqërinë. Të jesh i fortë dhe i paprekshëm kjo është kthyer në modë sot, rrezikon të na infektojë si shoqëri. Më shumë sesa të na infektojë ne, të infektojë të rinjtë në Shqipëri. Pyetja është çfarë i themi ne sot të rinjve të Shqipërisë? Ne i themi mos përdorni mendjen por përdorni muskujt.
Ne i themi mos mësoni, mos u edukoni, mos shkoni në shkollë se është kot, por vrisni, vidhni, trafikoni, përdorni drogë, shisni drogë, sepse kjo është mëyra më e shpejtë për të marrë një post publik dhe për të hyrë në Kuvend.
Çfarë mendon sot një fëmijë që jeton në provincë, prindërit e tij nuk kanë mundësi të shkojnë në shkollë. Çfarë i themi ne sot? i themi shit drogë, vrit, shko në Itali bëj trafik se kështu mund të vish në parlament.
Ne kemi bërë pak më shumë se kaq, kemi degraduar sistemin tonë arsimor. Nuk ka nevojë të mësosh të hysh në admnistratë, nuk ka nevojë të jesh i aftë për të ardhur në parlament. Mjafton të kesh bërë një krim, të kesh një mik dhe ai miku ta fshehë krimin. Ne kemi ndërtuar një klasë të re, të atyre që nuk ndëshkohen. Kjo klasë e re është ndërtuar në Shqipëri.
Edhe unë jam pjesë e një partie që ka 34 vjet që as voton as zgjedh njeri, fut njerëz të dënuar në listë. E dini pse?
Sepse në partinë ku jam unë, si në të gjitha partitë ku jeni ju, nuk ka votim. Kjo është kosto për të gjithë Shqipërinë.
Çfarë ndodh në partitë tona? Nëse je i pasur hyn, nëse je i varfër del, nëse vjedh gjithë votat e një fshati të respektojnë. Kjo është e vërteta. Këto janë partitë tona politike”.
/tesheshi.com/
