Deputeti socialist Ben Blushi ka deklaruar ditën e sotme se do të paraqesë 8 propozimet e tij në Kongresin e 19 marsit të Partisë Socialiste. Duke folur sot nga Kryesia e Kuvendit, Blushi tha se parimet lidhen me hapjen e Partisë Socialiste.
Ai deklaroi se në parimet e tij kërkohen zgjedhje paraprake që përmes zgjedhjeve ku do të kalojnë personat që kandidon qoftë për kryetar bashkish, etj. Lidhur me ndryshimet në statutin e PS, Ben Blushi u shpreh se ato nuk i ka parë askush, por nënvizoi se ndryshimet statutore duhet të ishin konsultuar në kryesinë e partisë dhe duhet të kalojnë në asamblenë e PS.
“Statuti i Partisë Socialiste po bëhet pa debat dhe se në të përcaktohen interesat dhe humori i një njeriu që është Edi Rama. Grupi i punës po i qep Edi Ramës një kostum statutor, ku ai pëlqen ngjyrat, kopsat etj. Por ky grup është përballë një pikëpyetje a ka fuqi prapavepruese statuti, ku thuhet se nuk do ketë zgjedhje për kryetarin e PS”, u shpreh Blushi.
Në vijim ai pyeti nëse ka ndonjë parti apo shtet në botë që të ketë një normë të tillë. Deputeti socialist shtoi në vijim se grupi i punës duhet t’i japë legalitet statutit dhe duhet të garantojnë disa parime themelore juridike dhe parimi më themelor sipas tij, është ai i prapaveprimit.
“Norma që po ndërtohet në statusin e PS ka efekt prapa veprues. Ky statut është vetëm për një njeri, për Edi Ramën”, deklaroi deputeti socialist
Ai vijoi duke thënë se shpreson që asambleja të bëhet para Kongresit dhe aty ai do të kërkojë të ketë garë për kryetarin, që statuti të mos ketë afat prapaveprues dhe do kërkojë që zgjedhjet për kryetarin të bëhen sipas parimit një anëtar një votë. /tesheshi.com/
