E ka marrë përsipër Taulant Balla, një prej anëtarëve të kryesisë së PS-së, që të konfirmojë faktin se kolegu i tij në parti dhe kryesi, Ben Blushi, nuk do mundet dot që të realizojë ëndrrën për të sfiduar Ramën në synimin për t’u bërë kryetar i PS-së në kongresin e afërt.
Sipas Ballës, çështja e kryetarit konsiderohet e zgjidhur, ndërsa në kongres ai vetëm do rikonfirmohet. Në një intervistë për Top Channel, Balla tha se ky është një debat i sajuar, i iniciuar nga njeriu i gabuar në momentin e gabuar.
Sipas tij, modeli që ka ndjekur PS me kryetarin e saj është ai i laburistëve në Angli. Balla tha ky model është ndjekur që në vitin 2009, kur Rama ka fituar me parimin “një anëtar, një votë”.
Ndërsa po sipas këtij modeli, sqaroi Balla, kryetari i partisë kur fiton zgjedhjet është automatikisht kryeministër, dhe mandati i tij automatikisht quhet i rinovuar deri në përballjen e radhës zgjedhore.
Në këtë mënyrë, Blushit i duhet tashmë të zgjedh nëse do vijojë të jetë pjesë e strukturave të PS-së dhe të vazhdojë betejën e vet të shpallur parimore duke mbetur në radhët e saj, apo nëse do largohet prej aty, tashmë që nuk po i jepet as shansi ta sfidojë me votë Ramën, ta klasifikuar prej tij si kundërshtar idesh e praktikash. /tesheshi.com/
