Partia Demokratike ka përkujtuar sot 19-vjetorin e vrasjes së ish-deputetit Azem Hajdari, një ritual ky i përvitshëm që organizohet nga kjo parti. E veçanta e homazheve të sotme ishte fakti që vajza e Azemit, Rudina Hajdari është deputete e PD-së, partisë së parë opozitare, ku një ndër themeluesit ishte edhe heroi i demokracisë.
Por veç deklaratave të zakonshme, kreu i FFRPD-së Belind Këlliçi duket se ka zgjedhur që në këtë ditë të bëjë një lidhje me asaj që përfaqësonte Hajdari dhe votimit në Kuvend të Gramoz Ruçit.
“Sot duhet të jemi kokëulur para Azemit, jo vetëm nga nderimi për veprën e tij, por edhe nga turpi. Para 19 vitesh trashëgimtarëve të diktaturës komuniste u duhej ta vrisnin deputetin e PD-së, se ai nuk tradhëtonte idealet, ndërsa sot e bëjnë më lehte, e blejnë me para, e kapin me presion.
Blerja e votave të demokratëve në favor të Gramoz Rucit është një këmbanë alarmi për çdo demokrat, për çdo njeri të lirë të këtij vendi.
Si kryetar i FRPD-së, ndjej detyrimin të theksoj se të rinjtë demokratë gjenden para një sfide edhe më të vështirë.
Sot duhet të zgjedhim të jemi robër të krimit ose të përballemi me këdo që përdhos lirinë dhe dinjitetin tonë. Për ta luftuar këtë të keqe, kapjen e demokracise duhet të mësojmë pa më të voglin hezitim nga brezi i Azemit.
FRPD ka detyrimin të përballet për një demokraci të vërtetë, që nis nga PD e shtrihet kudo në shoqerinë tonë. Nderim përjetë Azem Hajdarit”, shkruan Këlliçi. /tesheshi.com/
