Djali i një biznesmeni të pasur dhe koleksionisti arti është lënë në paraburgim në Belgjikë, pasi ka rrëfyer se ka vrarë gruan e dytë të babait të tij, me të cilën kishte mosmarrëveshje financiare.
Nicolas Ullens de Schouten, 57 vjeç, “ia atribuoi krimin një mosmarrëveshjeje familjare, të një natyre financiare”, shpjegoi të mërkurën zyra e prokurorit publik në Brabant, provinca frëngjishtfolëse ku ndodhën ngjarjet.
Sipas provave të para të hetimit, 57-vjeçari ka hapur zjarr duke shënjestruar njerkën e tij, 70-vjeçaren Miriam Ullens de Schouten, në momentin kur ajo po dilte me makinën e saj nga shtëpia e familjes në Lasne. Miriami ishte duke ngarë makinën dhe burri i saj ishte pasagjer.
Makina e Nikolas fillimisht u përplas me të tyren. Autori pranoi se u kishte krijuar një kurth, pasi e kishin nxjerrë jashtë pas një debati të ashpër.
Më pas ai qëlloi gjashtë herë, duke vrarë Miriam dhe duke plagosur babanë e tij, Baron Guy Ullens de Schouten, në këmbë.
Sot ai u procedua për vrasje dhe shkelje të ligjit për përdorimin e armëve, ndaj u vendos në paraburgim. Nicolas de Schouten, një ish-agjent inteligjence, u dorëzua në polici menjëherë pas vrasjes.
Familja është e njohur në botën e biznesit. Baroni Guy Ullens de Schouten, i cili është në dekadën e tij të 9-të të jetës, ishte për 40 vjet kreu i një grupi industrial, aktiviteti kryesor i të cilit ishte prodhimi i sheqerit. Më pas ai u zgjerua në sektorët e ushqimit dhe tekstilit, nëpërmjet fondit të investimeve Artal-Europe, ku ishte një nga aksionerët kryesorë. Pasi doli në pension në vitin 2000, ai investoi në një fondacion me bazë në Zvicër që “menaxhon aksione bamirësie dhe artistike”, siç thuhet në faqen e saj të internetit. Ndër të tjera, ai mbështet artistët kinezë, ndërsa zotëron edhe një shkollë ku ndjekin mijëra fëmijë, në Nepal.
Gruaja e dytë e baronit, Miriam, themeloi shtëpinë e modës Maison Ullens në Bruksel në vitin 2011. /tesheshi.com/
