Fredi Beleri, kandidati i Berisha-Metajt për Himarën, u la në arrest me burg nga Gjykata e Vlorës, nën akuzën e shitblerjes së votës, duke e acaruar kësisoj dhe më shumë Athinën zyrtare, e cila priste të paktën ndonjë ndjekje të tij në gjendje të lirë.
Nga diplomacia greke, në reagim shkohet deri aty sa Himara shpallet “qendra më e rëndësishme” e pakicës greke, diçka që asnjë minoritar i sinqertë e pamolepsur me nacionalizma arkaikë, nuk e pranon një fakt të tillë.
“Vendimi i sotëm i gjykatës së Vlorës, nëse provat nuk janë të pakundërshtueshme, është skandaloz. Arrestimi i një kandidati për Kryetar Bashkie dy ditë para zgjedhjeve nuk përbën shtet ligjor. Vendimi për ndalimin e kandidatit për Kryetar Bashkie sjell një ndryshim të plotë të rregullave të barazisë në zgjedhjet bashkiake në Himarë, qendra më e rëndësishme e pakicës kombëtare greke në Shqipëri.
Një vendim i tillë do të ndikojë edhe në marrëdhëniet e Bashkimit Europian me Shqipërinë, pasi kusht i kësaj rruge europiane është respektimi i rregullave europiane dhe parimeve të shtetit të së drejtës nga vendet kandidate. Vendime si ky i sotmi që shkelin parimet e mësipërme do të thotë se në praktikë Shqipëria nuk po ndjek rrugën europiane”, thuhet në deklaratën e Ministrisë së Jashtme greke.
Nga ana tjetër, Ministrja e Jashtme shqiptare nuk ka dhënë shenja të ndonjë “hapi pas”.
“Është thuajse e pamundur të kuptojmë se si miqtë tanë kanë të drejtë të kundërshtojnë një vendim gjykate në vendin tonë, kur provat e forta që ata kërkonin janë shumë të qarta. Fredi Beleri është kapur duke u përfshirë në aktivitet kriminal kundër zgjedhjeve të lira dhe të ndershme.
Nuk e kuptojmë se si të qenit me kombësi greke, mund ta përjashtojë atë nga ligji si shtetas i Shqipërisë. Ne u bëjmë thirrje miqve tanë grekë të përmbahen nga deklaratat që nuk respektojnë institucionet e pavarura të vendit tonë”, deklarohet nga dipomacia shqiptare, e cila gjithsesi nuk është marrë me frazën e rrezikshme të Athinës mbi Himarën si “qendra më e rëndësishme e minoritetit grek”.
Kështu, pas vitesh marrëdhënie të ngrohta Tiranë-Athinë, “shpatat janë zhveshur” sërish. /tesheshi.com/
