Kandidati i pavarur për kryetar të Skënderajt, Bekim Jashari ka bërë të ditur se së shpejti do të shpalos programin e tij qeverisës e që sipas tij ky program synon të trajtojë çdo sferë të ndjeshme të jetës së përbashkët të qytetarëve të Skënderajt.
Jashari thotë se Skënderaj do të qeveriset mbi bazën e parimeve për llogaridhënie dhe transparence.
“Kam kënaqësinë e veçantë që sot të ju drejtohem si kandidat i pavarur për të qeverisur bashkë me juve komunën tonë të dashur.
Siç edhe jeni në dijeni, sot edhe zyrtarisht filloi fushata zgjedhore për zgjedhjet lokale në Republikën e Kosovës – nndaj urime të gjithëve.
Unë Bekim Jashari, qytetar i Komunës së Skënderajt, duke vlerësuar nevojën e theksuar për ndryshime pozitive në komunën tonë dhe duke ju përgjigjur kërkesave tuaja të adresuara në forma dhe raste të ndryshme – vendosa që të kandidoj si Kandidat i Pavarur për Kryetar të Skënderajt, në Zgjedhjet Lokale 2017.
Po e filloj këtë adresim me një thënje të njohur të Presidentit Amerikan Woodroë Wilson se “prosperiteti është domosdoshmërisht tema e parë e një fushate politike”.
Jo rastësisht po e citoj këtë thënie, pasi që vendit, tani më shumë se kurrë i duhet një prosperitet i mirëfillët.
Për të arritur këtë qëllim madhor në Komunën tonë, nga dita kur i hyra kësaj gare për Kryetar të Komunës së Skënderajt, fillova edhe me turneun “Bekimi n’oda”, përmes së cilës jam munduar të dëgjoj dhe të komunikoj me të gjithë qytetarët komunës sonë, për të dëgjuar për së afërmi nevojat dhe idetë e juaja në përmirësimin e përgjithshëm të mirqënjes suaj dhe jetës në komunën tonë.
Ne do takohemi shpesh këto ditë, ku edhe do ju prezantoj me Programin e Qeverisjës, që kryesisht konsiston në prosperitet të sundimit të ligjit, zhvillimit ekonomik, arsimit, kulturës, sportit, turizmit, shëndetësisë, mirëqenies sociale dhe fuqizimit të rinisë. Pra, me një fjalë, ky program synon të trajtoj çdo sferë të ndjeshme të jetës sonë të përbashkët në Komunën e Skënderajt”, shkruan ai në një postim në rrjetet sociale. /tesheshi.com/
