Behgjet Pacolli është rikonformuar në krye të partisë së ij si President i AKR-së (Aleanca Kosova e Re) forcë të cilën vetë e themeloi vite më parë dhe që po e udhëheq gjithashtu, pa patur rivalë me emër brenda saj.
Në njoftimin për media të kësaj force politike thuhet se “në votimet për President të Aleancës Kosova e Re, gjithsej kanë marrë pjesë 50,028 persona ndërsa për Behgjet Pacollin në krye të AKR-së, kanë votuar 49,411 persona (98.77%). Vota kundër kanë rezultuar 531 (1.06%), ndërsa 86 vota (0.17%) janë shpallur të pavlefshme”.
Siç shihet pra, Pacolli ka fituar me të tillë rezultat që pothuajse marrin të gjithë krerët e partive shqiptare kur futen në votime.
Për momentin, AKR nuk gëzon pushtet në ndonjë instancë qeverisëse. Mimoza Kusari – Lila, kyetarja e Komunës së Gjakovës e ardhur nga kjo parti, tashmë ka themeluar tjetër forcë politikë së bashku me ish-vetëvendosësin Ilir Deda.
Ndërsa vetë Pacolli, postin më të lartë që ka gëzuar në politikën kosovare, ka qenë ai i Presidentit, por që zgjati vetëm pak javë pasi u zhvlerësua nga Gjykata Kushtetuese, një precedent i rrallë ky. /tesheshi.com/
