Kreu u AKR-së, Behgjet Pacolli, u ka shkruar një letër të gjithë anëtarëve të Kryesisë së partisë së tij, duke i sqaruar mbi vendimin për të hyrë në qeveri me PAN-in.
Pacolli shprehet se vendi po humbet shumë me bllokadën e krijuar pas zgjedhjeve të 11 qershorit dhe se vendimin e ka marrë pasi askush nuk e ka përkrahur propozimin e tij për qeveri gjithëpërfshirëse, ndërsa ka pritur LDK dhe VV të merren vesh, por pa rezultat.
Në këtë letër thuhet se AKR nuk bën koalicion as me PDK dhe as me dikë tjetër, por ndërton marrëveshje qeverisëse me kandidatin për kryeministër Ramush Haradinaj, me një mori propozimesh për reforma, të cilat vendin do ta fusin në binarët e duhur.
Letra e plotë e Behgjet Pacollit
Pse AKR në qeveri
Vendi u bllokua
Qëndrimi AKR-së ishte që Kosovës, pas rezultateve të 11 qershorit, i nevojitet një qeveri me bazë të gjerë.
AKR dhe deputetët e saj sikurse edhe subjektet tjera në koalicionin LAA kanë autorizuar Kryetarin e LDK-së që të negociojë me subjekte e koalicione të tjera për t`i themeluar institucionet e reja.
AKR ka qenë insistuese në vazhdimësi që LDK dhe LVV të arrijnë një marrëveshje për krijimin e shumicës parlamentare.
E kemi pritur VV dhe LDK për të arritur marrëveshjen, por ka qenë e kotë.
Iu dhamë edhe një limit kohor, me vullnetin e mirë që marrëveshja të arrihej. Kemi ndërmjetësuar në mënyrë aktive në këtë drejtim por ka qenë e kotë.
Kemi insistuar për qeveri gjithëpërfshirëse ose teknike për një periudhë të caktuar ku do të merrnin pjesë të gjitha partitë, për të zgjidhur dhjetë pikat kyçe që po mbajnë Kosovën peng, e pastaj të shkohet në zgjedhje.
Edhe këtë opsion nuk e donte askush.
Kosova nuk e ka luksin që të qëndrojë e bllokuar. Janë miliona e miliona euro që kanë humbur si rezultat i bllokadës politike. Madje janë rrezikuar edhe pagesat për veteranët e luftës nga bllokada. Në perspektivën afatshkurtër rrezikoheshin edhe pagat e mbi 60 mijë nëpunësve civilë.
Ndërkombëtarisht Kosova po humb çdo ditë miqtë e sa, imazhin dhe besimin. Investitorët në vend që të vijnë po ikin, ndërsa Kosova ditë pas dite po izolohet.
Partnerët ndërkombëtar dita ditës po e humbin interesin e tyre dhe përgjegjësitë po kalohen tek vendorët.
AKR si parti liberale që gjithmonë ka vënë në rend të parë interesin e shtetit dhe qytetarëve nuk ka mundur të jetë as pjesë e bllokadës dhe mos të bëjë zgjidhje aty ku mundet.
AKR tani për interes të qytetarëve dhe të kësaj çka u tha, ka vendosur që të mbështesë të mandatuarin për kryeministër, në mënyrë që vendit ti jepet një qeveri, dhe t´a nxjerrë nga kjo krizë e rëndë institucionale, pa krijuar trauma të tjera për qytetarët dhe në imazhin e Kosovës.
AKR nuk bën koalicion as me PDK dhe as me dikë tjetër por ndërton marrëveshje qeverisë me kandidatin për kryeministër Ramush Haradinaj, me një mori propozimesh për reforma të cilat do ta kthejnë vendin në binarët e duhur.
Reformat në administratën publike, ligjin e prokurimit, gjyqësor me synimin e përshpejtimit të çështjeve të pazgjidhura, rifunksionalizimin e zonave të lira ekonomike, krijimin e instrumenteve moderne për futjen e pronave të Kosovës në zinxhirin ekonomik, reformave në bujqësi, ruajtjen e ambientit, rifunksionalizimin e minierave, zhvillimin e infrastrukturës moderne, investimet në shëndetësi, arsim, kulturë dhe sport, ruajtjen e trashëgimisë kulturore.
Integrimi i Kosovës në arenën ndërkombëtare dhe organizatat botërore njohje dhe anëtarësimet, paraqesin një kusht të pamohueshëm të bashkëpunimit.
Këto janë temat të cilat janë diskutuar me kandidatin për kryeministër dhe për të cilat ekziston një dakordim i plotë.
Ministritë të cilat udhëhiqen nga AKR do të jenë efikase, të suksesshme dhe me rezultate të prekshme pozitive nga qytetarët. /tesheshi.com/
