Kryetari i AKR-së, Behgjet Pacolli, ka thënë se partitë politike janë duke tejkaluar çdo kufi të durimit të qytetarëve me “lojërat, inatet e teket dhe interesat e ndryshme të secilit”.
Sipas tij, të gjithë janë duke zvarritur formimin e qeverisë në kërkim të zgjedhjeve të reja. “Të gjithë po zvarrisin proçeset, nuk po krijohet qeveria, alternativë qeverisëse e re, për t’i dalë në ndihmë qytetarit. Me këto veprime, më duket që secili po kërkon zgjedhje të reja. Alternativa e zgjedhjeve të parakohshme me këtë Kod Zgjedhor është jo reale”, ka shkruar Pacolli në Facebook.
Ai më tej shpreh bindjen se oferta e tij për qeverisje me bazë të gjerë është më e drejta, e cila do të duhej të trajtonte me prioritet disa cështje, ndërsa kërkon të mblidhet një tryezë e partive parlamentare shqiptare.
“Të miratohet një set reformash të shpejta: çështja e demarkacionit, liberalizimin e vizave, Kodi i ri Zgjedhor, çështja e bisedimeve me Serbinë (afati, ekipi i ri, ofertat, grupi i konsulentëve ndërkombëtarë). Unë kësaj platforme do t’i shtoja dhe një ligj të ri për dekriminalizimin dhe vettingun. Në qeveri duhet të bëjnë pjesë të gjithë partitë shqiptare. Me mandat të kufizuar, por me konsensus sa më të gjerë. Kjo qeveri nuk është amnisti për kërrkënd, por zgjidhja më e mirë për kohën që po kalojmë. Bota nuk na pret ne, familjet që duan lëvizje të lirë, zgjidhje për problemet e tyre, nuk na presin”, tha Pacolli.
Këto komente kreu i AKR i ka bërë pasi në mëngjes në shtëpinë e tij ka pritur një grua, e cila i ka kërkuar ndihmë për ta vizituar djalin e saj në Gjermani.
“Nuk kishte as para, as rezervim për ndonjë biletë, e as vizë. Edhe pse do doja shumë, nuk munda t’a ndihmoja në të gjitha nevojat e saj dhe mbeta edhe unë i dëshpruar”, shkruan ai. /tesheshi.com/
