Kryeministri turk, Binali Jëlldërëm, ka dalë para gazetarëve rreth orës 03:00, në të gdhirë të së mërkurës, duke lajmëruar vdekjen e 36 personave nga shpërthimet në aeroportin Ataturk në Stamboll.
Akti terrorist është kryer nga tre kamikazë, që përpara se të hedhin veten në erë kanë hapur zjarr. Të tre terroristët kanë mbërritur në aeroport me taksi, dhe nuk bëhet fjalë që një prej tyre të ketë marrë arratinë.
Gjithnjë sipas kryeministrit turk, provat e para flasin për një akt terrorist të DAESH-it. Ai e ka përjashtuar mundësinë që të ketë pasur probleme me sigurinë në aeroport.
Binali Jëlldërëm ka bërë një lidhje mes nisjes së procesit të normalizimit të marrëdhënieve me fqinjët dhe shpërthimeve në aeroport, duke e quajtur domethënës aktin terrorist.
Në të njëjtën kohë, ai ka njoftuar për rihapjen e aeroportit dhe për kthimin në normalitet të trafikut ajror. /tesheshi.com/
