Kryetari i Klinës, Sokol Bashota, të cilit ju bastis shtëpia dhe zyra e punës, është bërë i gjallë përmes një intervistë dhënë për Radio Televizionin Publik të Kosovës.
Mosparaqitjen në media, Bashota e ka arsyetuar me faktin se është lënduar në fytyrë gjatë një ndeshje futbolli, dhe nuk ka mundur të prononcohet.
Ai ka thënë se sot ka marrë ftesën nga policia për të dhënë dëshminë e tij më datë 9 shkurt.
Ai ka “kërcënuar” prokurorinë duke thënë se do ta humbin betejën me të për shkak se akuzat e ngritura ndaj tij janë politike dhe të qëllimshme.
“Nëse kanë tendencë me denigru personalitetin tim, le ta dijnë ata prokurorë se kanë me humb betejën sepse vet ata janë të korruptuar”, ka thënë Bashota, derisa ka shtruar pyetjen “pse prokuroria nuk merret me 70 lëndët që rëndojnë mbi kryeminstrin Isa Mustafa?!”
Duke folur për bastisjet e djeshme, ai ka thënë se nuk është dashur të ndodhin me aq pompozitet siç është bërë.
“Jo vetëm nga ana ime si kryetar komunal, por edhe nga vet stafi nuk ka qenë një bastisje e nevojshme me këtë pompozitet pasi dokumentet janë në faqen e komunës së Klinës, kështu që s’ka pas nevojë të bëhet një zhurmë e madhe për asgjë”.
“Ka tendenca për arsye se unë jam një ndër ata që ja kam ndryshu pamjen e Klinës dhe jam njeri i vetëm që kam ndërtu raporte ndër fetare, duke ofruar mysliman e katolik të jenë së bashku në festa fetare”, ka deklaruar Bashota. Përgatiti: Blendi Gashi – /tesheshi.com/
