Janë zbuluar sot nga FIFA emrat e 23 kandidatëve nga do të dalë lojtari më i mirë i vitit 2016, një çmim që do të jepet në nisje të vitit të ardhshëm.
Lojtari më i mirë i vitit është një nga tetë çmimet që do të jepen nga FIFA në ceremoninë e cila do të zhvillohet në Cyrih më 9 janar të 2017-s.
Votimi fillon sot dhe mbyllet më 22 nëntor. Lojtari më i mirë i vitit ka për t’u zgjedhur nëpërmjet një procesi votimi të kombinuar. 50 për qind e vendimit do të bazohet në votat e trajnerëve dhe të kapitenëve të ekipeve kombëtare, e gjysma tjetër do të ndahet mes një votimi publik online dhe opinioneve prej një grupi të zgjedhur nga mbi 200 përfaqësues të medias anembanë botës.
Më 2 dhjetor do të dalë një listë e shkurtuar, me emrat e tre lojtarëve, për ta mësuar më të mirin midis tyre në janar.
Lista e publikuar nga FIFA përfshin këta lojtarë sipas rendit alfabetik: Aguero, Bale, Buffon, Cristiano Ronaldo, De Bruyne, Griezmann, Ibrahimovic, Iniesta, N’Golo Kante, Kroos, Lewandowski, Mahrez, Messi, Modric, Neuer, Neymar, Özil, Payet, Pogba, Sergio Ramos, Alexis Sanchez, Luis Suarez, Jamie Vardy. /tesheshi.com/
