Për herë të parë, në gjuhën politike, Ilir Meta ka dhënë të kuptuar se ai është njeri i lexuar.
E ka bërë këtë në një reagim të kritikave më të fundit ardhur në adresë të tij, në formë mallkimesh, në kampi i opozitës, befasuar nga fakti se ai dekretoi ndryshimet e qeverisë në Kodin Penal, aty ku parashikohen dënime më të ashpra në kuadër të kërcënimit virusal.
Për Metën, ata që i janë vërsulur orët e fundit, janë të palexuar.
Sot është një ditë e rëndësishme, Dita Ndërkombëtare e Librit.
Por fatkeqësisht ka disa ‘pseudo-intelektualë’ dhe ‘pseudo-ekspertë’, të cilët jo vetëm kanë harruar të lexojnë libra, por as duan të lexojnë e të kuptojnë vendime të thjeshta, por tepër të rëndësishme për jetën dhe sigurinë e të gjithë qytetarëve në këto momente të vështira pandemie.
Sinqerisht u sugjeroj të thellohen dhe të lexojnë variantin final të miratuar nga Kuvendi pas ndryshimeve thelbësore të propozuara publikisht nga Presidenti i Republikës.
Dhe meqënëse janë kaq të brengosur për cenimin e të drejtave të njeriut, po citoj vetëm dy nene, të një vendi që e kam për zemër si kampion të demokracisë, të drejtave të njeriut dhe që shpiku institucionin e Ombudsmanit (Avokatit të Popullit), si Danimarka”, shkruan Meta dhe vijon duke ofruar këtë model ndëshkimesh penale, ardhur nga vendi skandinav:
Neni 192
2. Nëse sëmundja është e tillë që, sipas ligjit, plotëson kushtet për trajtim nga shëndeti publik ose në kohën kur kryhet vepra po trajtohet si e tillë, ose nëse masa të veçanta janë marrë nga shteti kundër sëmundjes, dënimi është burgim deri në 6 vjet.
Neni 252
1. Personi i cili, për qëllime përfitimi, ose me dashje ose për shkak të një neglizhence të ngjashme, vë në rrezik kërcënues jetën apo aftësinë fizike të të tjerëve, dënohet me burgim deri në 8 vjet.
Pra të dashur ‘armiq’ të librit, megjithëse leximi i librit është një mundim shumë i madh për ju, besoj se këto dy rreshta do gjeni kohë t’i lexoni.
Me përgjegjshmëri të plotë dhe me koherencën e përhershme jo vetëm e mbrojta Kushtetutën, por edhe zgjidhëm boshllëkun, që kishte Kodi Penal për ata që donin të përdornin pandeminë kundër shëndetit të qytetarëve, duke vendosur për këtë çështje madhore një standard si të Danimarkës.
Ah sikur të kishim në çdo fushë standarde të tilla….”, shkruan kreu i shtetit.
Por kujtojmë se pikërisht për këtë dimension të munguar të Metës në përformancën publike, pra lidhjen e tij me leximin, me librin, ai shpotitej nga Rama gjatë kohës së daljes së Kurban-it, teksa pyetej, po me shpoti, nëse Meta e kish lexuar librin (kriza e rëndë mes tyre 2009-2012). Rama përgjigjej shkurt: Meta s’lexon libra!
Tashmë, një klimë paqeje është rishfaqur mes tyre, por e pëërligjur me krizën pandemike. Rama ka vlerësuar komunikimet mes tij dhe Metës në dy mbledhje të Këshillit të Sigurisë Kombëtare, duke thënë se e tilla duhej të qe politika….Ah sikur! /tesheshi.com/
