Deklaratat kryeministri rus, Dmitriy Medvedev për mundësinë e largimit të Bashar al-Assad nga pushteti, kanë tërhequr vëmendjen e të gjithë atyre që ndjekin këto ngjarje. E ndërsa disa shprehin çudi nëse ekziston mundësia e ndryshimit të pozicionit të Rusisë, të tjerë besojnë se kjo është vetëm një manovër politike.
Medvedev, në një intervistë me kanalin Izraelit 2 ka thënë se ekziston mundësia e formimit të një qeverie të re siriane pa pjesëmarrjen e Asadit, duke shtuar se ndryshimi i qeverisë duhet të bëhet përmes negociatave. Në këtë mënyrë do të gjendej një zgjidhje që do të rezultonte me ndërprerjen e krizës dhe formimin e një qeverie të re, pa Asad, në qoftë se për këtë vendos populli sirian.
Anëtari i Duma-s ruse, Yevgeny Fyodorov, thotë se në deklaratat e Medvedev nuk sheh asgjë të re, duke theksuar se Rusia, që nga fillimi i krizës, ka vënë theksin në faktin se vendimi duhet të jetë në duart e popullit sirian, dhe se vetëm njerëzit kanë fuqinë për të vendosur se kush do të mbetet në pushtet.
Ai shtoi se kryeministri ka përmendur se, në qoftë se negociatat në mes të palëve siriane do të çojnë në formimin e një qeverie të re, pa Asadin, ky i fundit nuk do të jetë një pengesë. “Kjo nuk është në asnjë mënyrë në kundërshtim me pozicionet parimore të Rusisë ndaj konfliktit”, tha ai.
Eksperti për media, Pavel Rodkin beson se Rusia që nga fillimi ka mbështetur regjimin sirian, duke supozuar se është e nevojshme për të ruajtur unitetin e kufirit sirian dhe për të parandaluar lëvizjet islamike që mund të marrin frenat e pushtetit në duart e tyre, dhe se kjo nuk ka qenë ndonjë mbështetje konkrete për Asadin.
Qetësimi i situatës
Ai beson se interesat e Rusisë kërkojnë që të parandalohet kthimi i “terroristëve” me origjinë ruse, si dhe që t’u ndalohet kthimi i vullnetarëve nga ish-republikat e Bashkimit Sovjetik në vendet e tyre dhe angazhimit të tyre për grusht-shteti kundër regjimeve në pushtet.
Në një intervistë për Al Jazeera, ai shton se deklarata e Medvedevit përcjell një mesazh pozitiv për perëndimin që ka për qëllim uljen e tensioneve dhe kërkimin e një gjuhe të përbashkët që do mund të hapë rrugën për gjetjen e ndonjë zgjidhjeje.
Politikani opozitar rus, Pavel Shelkov konsideron se prapa deklaratave të Medvedevit qëndrojnë dy arsye: së pari, kjo është një përpjekje për të qetësuar situatën dhe për të shpëtuar nga ndjekja penale, pasi Franca dorëzoi një kërkesë në Gjykatën Penale Ndërkombëtare në Hagë për të ndaluar masakrat e kryera nga aeroplanët rusë kundër civilëve në Halep. Masakra e fundit e aviacionit rus ishte sulmi në shkollë në fshatin e Has-it. Arsye tjetër është se Rusia, as pas një viti ndërhyrjeje ushtarake nuk ka arritur të shkatërrojë opozitën siriane. Kjo e fundit ka arritur të kthejë pjesën më të madhe të pozicioneve mbi të cilat regjimi sirian mori kontrollin me ndihmën e Rusisë.
Ai shtoi se Rusia po përpiqet të fshehë “dështimin” e saj për të zbatuar planin e krijimit të rripit “Novorossiya” (Rusia e re) që do të shtrihej nga Pridnestrovie (Moldavia) deri te Odessae (Ukraina).
Shelkov konsideron që deklaratat e Medvedevit janë manovër e re, me qëllim të qetësimit të situatës me Perëndimin. Nëse do të ketë ndryshime në Siri, do të jenë këto vetëm ndryshime formale, ndërkohë që regjimi aktual sirian do të mbetet në fuqi.
Roli i Amerikës
Opozita ruse ka theksuar se Medvedev nuk ka autoritet për të paraqitur deklarata të ashpra përderisa nëse nuk ka mbështetjen e Kremlinit. Fakti që deklaratat që vijnë nga kryeministri dhe jo nga presidenti, mbajnë të hapur mundësinë e tërheqjes së tyre, në rast se paraqitet nevoja.
Nga ana e tij, një ekspert për Lindjen e Mesme, dr.Yuri Zenin konsideron se mesazhi i Medvedevit ka për synim që të ruajë fytyrën e amerikanëve, në mënyrë që të mos mbetet rezultati final – fitorja e rusëve kundrejt humbjes së amerikanëve.
Për të sqaruar këtë mendim, Zenin ka lidhur ngjarjet aktuale me ndërhyrjen sovjetike në Afganistan dhe këmbënguljen e Shteteve të Bashkuara për të parandaluar një marrëveshje në bazë të së cilës sovjetikëve do t’u lejonte një tërheqje dinjitoze. Rezultati i gjithë kësaj ishte ardhja e talebanëve në pushtet në Afganistan.
Ai shtoi se Rusia në këtë mënyrë dëshiron të inkurajojë Shtetet e Bashkuara në drejtim të arritjes së një marrëveshjeje që do të çonte në formimin e një qeverie të re në pajtim me Uashingtonin. /tesheshi.com/
