Ndryshe nga deklaratat nacionaliste të bashkëqytetarëve maqedonas në drejtim të shqiptarëve në Maqedoni, kësaj rradhe ka qenë ish-ministri i punëve të brendshme të Maqedonisë, Lube Boshkovski ai i cili në një konferencë për shtyp pas daljes së tij nga burgu ka deklaruar që gjysma e të burgosurve në burgjet e Maqedonisë aty gjenden pa faj, ku në mesin e tyre është edhe shqiptari nga Kosova, Florim Maloku. Për Florimin. Boshkovski ka thënë se ka qëndruar 5 vite të plota bashkë në burg, dhe ka mësuar se Florimi po vazhdon të vuan burgun thuajse 8 vite pa asnjë dëshmi.
“Gjatë këtyre ditëve po angazhohem për një mik nga Kosova, me të cilin kaluam bashkë 5 vite, zotëri Florim Maloku, i cili 8 vite është në burg për një vepër e cila nuk është dëshmuar. Sot dua të apeloj për kushtet në burg, t`i ndihmojmë drejtorive të burgut për kushtet e pavolitshme për jetesë ku gjenden të burgosurit në të gjitha burgjet e Maqedonisë”, deklaroi Boshkovski.
Ai theksoi se i tërë kredibiliteti i tij politik është i drejtuar në përmirësimin e kushteve në burgje, ndërsa para së gjithash të revidohen të gjitha procedurat e të burgosurve të cilët padrejtësisht gjendet në burg.
“Unë ju garantoj se atje ka edhe persona të dënuar me burg të përjetshëm për të cilët nuk është dëshmuar vepra. Ky është një problem serioz me të cilin po përballet Maqedonia, problem të cilin pres që të zgjidhet dhe kuptohet seriozisht, ndërsa për rastin tim të tjerët po flasin”, deklaroi Boshkoski.
Boshkovski vuajti 5 vite burg, pasi që më 5 qershor 2011 u arrestua para një restoranti ekskluziv në qendër të Shkupit, për financim të paligjshëm të fushatës zgjedhore me partinë e tij. Rasti i tij u notua edhe nga Departamenti Amerikan i shtetit si i burgosur politik.
Ndryshe Boshkovski është i njohur edhe si i dënuar për krime lufte nga Tribunali i Hagës, për vrasjen e civilëve shqiptarë gjatë konfliktit të vitit 2001 në fshatin Luboten të Shkupit. /tesheshi.com/
