Ka befasuar kreu demokrat Basha, pasi urimin e tij kortezial për nisjen e vitit të ri shkollor, e ka patur fund e krye jo politik.
Ndryshe nga Meta, aleati i tij në krye të opozitës nga pozita e kreut të shtetit, i cili bëri thirrje për “Dhjetor ‘90” mu në ditën e parë të shkollës, Basha është treguar i vetëpërmbajtur.
“Të dashur nxënës dhe mësues që sot nisni vitin e ri shkollor, ju uroj nga zemra suksese! Urime më të mira për mësuesit tanë që këtë vit do të përballen me orare të zgjatura dhe vështirësi më të mëdha se vitet e tjera.
Jam i bindur se me përkushtimin për profesionin dhe kujdesin për nxënësit, do t’ia dilni me sukses për të përballuar këtë realitet të ri dhe sfidues.
Një urim i veçantë nga zemra për vogëlushët që sot ulen për herë të parë në bankat e shkollës. Askush nuk do donte që dita juaj e parë e rrugëtimit drejt dijes të ishte si kjo e sotmja në mes të pandemisë, shoqëruar me masa të veçanta që e bëjnë të vështirë këtë fillim shkolle.
Urime të gjithë gjimnazistëve në këtë vit sfidues!
E di se do ta keni të vështirë të ruani distancën, pasi e tillë është edhe energjia e moshës, por ju lus të silleni me vetëdijen se nga sjellja juaj varen jetë njerëzish.
Normaliteti do rikthehet sërish, e ju mund të kapni kohën e humbur me njëri-tjetrin. E vetmja gjë që nuk kthehet është jeta.
Pranda lutja ime për të gjithë ju është: respektoni masat, ruani veten dhe njëri-tjetrin”, shkruan njeriu në krye të opozitës. /tesheshi.com/
