Një ditë pas kryeministri në detyrë Albin Kurti tha se ai do vijojë të qeverisë deri në zgjedhjet e reja, i mandatuari nga presidenti Thaçi për ta zëvëndësuar, Abdullah Hoti i LDK-së, ka folur si të qe ai kryeministër, ose shumë afër të qënit i tillë.
“Mbi 1 miliard euro do të mobilizohen për zbatimin e Pakos për Rimëkëmbje Ekonomike të Qeverisë së re”, ka shkruar ai në FB, duke vijuar se “një pjesë e konsiderueshme e këtyre mjeteve do të futen në ekonomi sivjet, për të mbështetur bizneset që të qëndrojnë në treg dhe të mbajnë punëtorët në punë.
Ndërkaq, në vitet në vijim do të mbështeten investimet private dhe publike që krijojnë vende pune në prodhim, bujqësi, teknologji dhe sektorë me vlerë të shtuar.
Në zbatimin e masave të kësaj pakoje do të përfshihen odat ekonomike, bankat, shoqatat e profesionistëve, institucionet akademike, komunat, investitorë nga diaspora jonë dhe partnerët ndërkombëtar që mbështesin zhvillimin e Kosovës. Legjislacioni i nevojshëm për zbatimin e kësaj pakoje do të procedohet në Kuvend menjëherë pas formimit të Qeverisë së Re”.
Më tej, Hoti e bën pra të qartë se e gjitha kjo i përket qeverisë së tij.
“Kjo pako është pjesë e Programit të Qeverisë së Re, që është duke u harmonizuar me të gjithë partnerët e koalicionit qeverisës”, shkruan njeriu që synon të pasojë Kurtin.
Siç dihet, Gjykata Kushetuese e ka pezulluar procesin e formimit të një qeverie të re, së paku për një periudhë një mujore. /tesheshi.com/
