Kosova ka zënë vend të veçantë në një fjalim të ish-presidentit Clinton, në vizitën e parë të tij në Shqipëri. Nga shkallët e godinës qeveritare në Tiranë, njeriu që u angazhua me bombardimin e Serbisë në pranverën e ‘99-ës, e cilësoi si “marrëzi” atë që prej javësh po ndodh në veri(Kosovë).
“Ka një mosmarrëveshje që po ndodh tani në Kosovë që do të doja të mos kishte ndodhur kurrë. Nuk është më vendimi im, por kosovarët i krijuan ato katër qyteza në të mirë të serbëve për t’u dhënë katër kryebashkiakë më tepër.
Mendoj se është e lehtë për shqiptarët, tani në shumicë që të përpiqen që të përfitojnë nga momenti, për të paraqitur argumentin tyre, por gjëja e vërtetë që duhet të bëjmë është ta ndalim këtë marrëzi. Nëse mendoni për këto katër qyteza, shumë larg nga çdo laborator modern shkencor, ku modelohet sjellje që po e nxit botën sot, pasi drejtohet nga njerëz që preferojnë dominancën në vend të bashkëpunimit. Shpresoj që Shqipëria të jetë në gjendje t’i tregojë botës sesi duket një e ardhme gjithëpërfshirëse”, tha Clinton, duke i lënë Tiranës zyrtare një peshë të madhe në zhvillimet rajonale.
Para këtyre mesazheve, ish-presidenti amerikan u ballafaqua me një surprizë. Një grup të rinjsh nga Kosova, të gjithë me emrin Clinton, kanë përshëndetur dhe falënderuar presidentit për çfarë ka bërë për vendin e tyre.
“Jam Klintonita nga Peja. Tezja më vuri emrin e familjes tuaj për të treguar mirënjohjen për atë që ju keni bërë për ne, që të fitojmë pavarësinë dhe të jemi vend demokratik. Ju jeni arsyeja që ne sot kemi liri dhe paqe”, tha një vajzë.
“Jam Klinton Berisha, jam shumë i nderuar të mbaj mbiemrin e familjes tuaj si emrin tim”, u shpreh një i ri.
Unë jam Bill Klinton Krasniqi dhe vij nga Mitrovica. Jam krenar që kam emrin tuaj dhe jam Bill Klinton i Kosovës”, u shpreh një tjetër.
Nuk munguan në prezantim edhe vajza nga Kosova që mbajnë emrin Hillari, si bashkëshortja e presidentit, gjë që solli të qeshura tek ky i fundit.
Presidenti i 42-të i SHBA-së u nderua nga kryeministri Edi Rama me medaljen e “Yllit të Mirënjohjes Publike”, çmimi më i lartë që jepet nga Kryeministria.
“Njeriu nga shpresa, keni qenë me ne gjatë kohës, sot jeni mes nesh për të na kujtuar mësimet nga një histori jo fort e largët për të konfirmuar riangazhimin e Amerikës ndaj paqes sonë dhe njëherë të na thërras në shpresë. Iu kërkoj me përulje të pranoni ‘Yllin e Mirënjohjes” për arritjen publike, që është çmimi më i lartë që jepet nga zyra e kryeministrit dikujt që e meriton këtë mirënjohje”, tha Rama. /tesheshi.com/
