Pakkush e kishte menduar një fitore të Uellsit. Para çerekfinales mes Belgjikës dhe Uellsit qe pretenduar vetëm për një qëndresë të përkohshme të skuadrës të sjellë rreth madrilenit Gareth Bale, por asnjë imagjinatë nuk shkonte përtej kësaj.
Aq më tepër pasi belgët e nisën ndeshjen me një gol të gjetur shpejt. Nainggolan do të lëshonte një predhë nga shumë larg zonës së rreptësisë, duke i kaluar belgët në epërsi në minutën e 13-të. Dhe kur u duk se Belgjika i kishte marrë frenat e lojës në dorë, do të vinte dhe barazimi i Uellsit. Williams e çon ndeshjen në 1-1 në minutën e 30-të.
Chris Coleman, trajneri i Uellsit, kishte deklaruar para ndeshjes se nuk ishte i kënaqur me arritjen në çerekfinale, duke nënkuptuar se kërkonte shumë më tepër. Dhe loja e skuadrës së tij i dha të drejtë.
Bale qe i papërtuar, edhe pse nuk do të shënonte, por do të spikasnin dhe Ramsey e Robson-Kanu. Ky i fundit do të shënonte në minutën e 55-të, për t’u dhënë epërsinë uellsianëve. Pasi kanë përballuar reagimin belg, vjen dhe goli i tretë. Vokes e gjen rrjetën kundërshtare pesë minuta para mbylljes së lojës. Belgjika dorëzohet teksa rezultati shkon në 3-1 për Uellsin.
Courtois, Hazard, De Bruyne, Carrasco, Lukaku, Mertens e Fellaini, për të përmendur disa prej emrave më të njohur të Belgjikës, skuadrës së dytë në renditjen botërore të FIFA-s, nuk mundën t’i bëjnë ballë entuziazmit, këmbënguljes e dëshirës për të fituar të uellsianëve, që kthehen të shkruajnë historinë pas 58 viteve.
E para gjysmëfinale në një turne të madh për Uellsin, që tani do të ketë për kundërshtar Portugalinë. Të mërkurën, më 6 korrik, në Lion, do të vihen përballë dy yjet e Realit të Madridit, Cristiano Ronaldo e Gareth Bale. /tesheshi.com/
