Qendra Evropiane për Parandalimin dhe Kontrollin e Sëmundjeve ka paralajmëruar se do të jetë e nevojshme të menaxhohen pritshmëritë e popullatës gjatë zbutjes graduale të masave të paraqitura për shkak të pandemisë koronare.
“Kjo është një maratonë, jo një sprint. Me siguri e keni dëgjuar këtë më parë, por nuk është e gabuar. Pritshmëritë e njerëzve për pandeminë, kohëzgjatjen e saj, pasojat që do të ketë ajo në jetën e tyre në të ardhmen e afërt, të gjitha duhet të menaxhohen”, tha drejtoresha e Qendrës Andrea Ammon para Komisionit të Parlamentit Evropian për Shëndetin Publik dhe Mjedisin.
Ajo shtoi se njerëzit duhet të jenë të përgatitur mendërisht që kjo të mos shkojë aq shpejt.
Qendra Evropiane për Parandalimin dhe Kontrollin e Sëmundjeve, një agjensi e vogël e Bashkimit Evropian me qendër në Suedi, papritmas është vënë në qendër të vëmendjes me shfaqjen e pandemisë koronare.
Ammon gjithashtu tha që njerëzit duhet të qëndrojnë vigjilentë dhe se rregullat e higjenës, siç janë larja e duarve, veshja e maska dhe ruajtja e distancës sociale, duhet të vazhdojnë të zbatohen gjatë masave të zbutura.
Sipas qendrës, më shumë se 1.3 milion të infektuar janë regjistruar në Evropë deri më 3 maj, dhe më shumë se 140,000 njerëz kanë vdekur nga sëmundja.
“Vala fillestare e transmetimit duket se ka arritur kulmin, me një rënie në (numrin e të infektuarve) në shumicën e vendeve të BE”, dhe me vendet që janë në rrugën për t’u bashkuar, tha Ammon. /tesheshi.com/
