Nga BE ka ardhur një tjetër mesazh për klasën politike shqiptare, për t’u ulur për Reformën Zgjedhore. Ka qenë zëdhënësja e Brukselit Maja Koçijançiç ajo e cila ka deklaruar se “Reforma zgjedhore dhe zbatimi i rekomandimeve të qarta të OSBE-ODIHR-it janë një test i rëndësishëm për Shqipërinë”.
Por siç dihet,opozita jashtëparlamnetare, edhe pse e ftuar në tryezë, i ka dërguar ultimatum mazhorancës, nëpërmjet një dokumenti me 5 pika, përcjellë nën slloganin “o zbatojë o hap krahun”, pa preferuar më parë që të ulet në tryezë. Ndër 5 pikat, njëra kërkon që ajo(mazhoranca) të mos e njoh për opozitë grupimin brendaparlamentar që ka dalë nga listat e PD dhe LSI, e tjetra që në reformë të jenë dhe faktorët ndërkombëtarë, gjë që këta të fundit deri tani e kanë injoruar si kërkesë.
“BE rithekson nevojën që të gjithë aktorët politikë të demonstrojnë gatishmëri të vërtetë për të kontribuar, përmes dialogut konstruktiv, dhe për të bërë progres me reformën zgjedhore”, përfundoi zëdhënësja e Bashkimit Europian. /tesheshi.com/
