Komisioneri Evropian për Tregtinë, znj. Cecilia Malmstrom, duke komentuar vendimin e Shteteve të Bashkuara që prej 1 qershorir kanë filluar të zbatohen tarifa shtesë doganore për çelikun dhe alumimin, kundrejt Meksikës, Kanadasë dhe BE-së, tha se amerikanët po luajnë një lojë të rrezikshme.
“Ne nuk jemi në luftë tregtare, por ne jemi në një situatë të vështirë dhe situata është me të vërtetë shqetësuese. SHBA janë duke luajtur një lojë të rrezikshme”, tha Malmstrom në një konferencë shtypi në Bruksel, duke komentuar vendimet e fundit të Uashingtonit.
Ajo vuri në dukje se kjo lloj procedure amerikane sigurisht që përfaqëson një “proteksionizëm”.
“Ky vendim ndikon negativisht në marrëdhëniet transatlantike dhe tregjet globale”, tha Malmstrom.
Ajo kujtoi se BE kishte mbajtur takime të shumta me zyrtarët amerikanë në të kaluarën për të parandaluar këtë lloj zhvillimi, duke shtuar se SHBA nuk ofroi ndonjë zgjidhje tjetër për Brukselin.
Ajo theksoi se sistemi i tanishëm tregtar botëror ka mangësi të caktuara, duke theksuar se gjithsesi, të gjithë duhet të veprojnë në përputhje me rregullat ekzistuese.
“Kjo është arsyeja pse sot BE-ja në këtë drejtim ka dorëzuar një kërkesë në Organizatën Botërore të Tregtisë. Ne kemi filluar të punojmë për kundërmasa “, tha komisionerja Malmstrom.
Ajo vuri në dukje se futja e detyrimeve shtesë doganore për makinat e importuara nga Evropa do të shkaktonte “dëme” të mëdha në SHBA, Europë dhe ekonomi të tjera në botë.
Ajo u bëri thirrje të gjitha vendeve që eksportojnë çelikun dhe aluminin në Shtetet e Bashkuara për të filluar procedurat ligjore në kuadër të OBT-së. /tesheshi.com/
