Policia e Kosovës ka hasur në rezistencë të armatosur në aksionin e sotëm në komunat veriore, gjë që ka bërë që aksioni që la 4 policë të plagosur të marrë edhe vëmendjen e Bashkimit Europian.
Në një deklaratë për Rrjetin Ballkanik të Gazetarisë Hulumtuese (BIRN), zëdhënësja e BE-së, Maja Kocijançiç, i ka bërë thirrje edhe Prishtinës dhe Beogradit për përmbajtje.
“Ne jemi në kontakt me udhëheqjen në Prishtinë dhe Beograd dhe kemi bërë thirrje për përmbajtje maksimale”, tha Kocijançië.
Duke folur për aksionin e sotëm të Policisë së Kosovës, Kocijançiq thotë se operacionet e tilla duhet ta forcojnë procesin e normalizimit dhe jo ta dëmtojnë.
“Mbështetja e sundimit të ligjit është një objektiv që BE mbështet fuqishëm. Operacionet e policisë duhet të sjellin besim në sundimin e ligjit për të gjitha komunitetet. Operacione të tilla duhet të përforcojnë dhe jo të dobësojnë përpjekjet e normalizimit”, tha tutje Kocijançiq.
“Operacioni policor në Mitrovicë që synon individë të dyshuar nga i gjithë rajoni dhe pjesë tjera të Kosovës, në bazë të urdhrave të gjykatës, duhet të bëhet në përputhje me ligjin dhe të komunikohet siç duhet”, tha tutje Kocijançiq për BIRN.
Policia e Kosovës sot në orët e para të mëngjesit ka marrë një aksion në komunat veriore ku ka arrestuar disa persona me dyshimin për kontrabandë dhe krim të organizuar. Aksioni i cili ka për qëllim zbatimin e ligjit në komunat e udhëhequra nga serbët, vie pak ditë pas zgjedhjeve të mbajtura atje. /tesheshi.com/
