Presidentja e Komisionit Evropian Ursula von der Leyen ka pranuar për herë të parë mangësitë në nivelin evropian në prokurimin e vaksinave anti-COVID.
“Bashkimi Evropian ka nënvlerësuar ndërlikimet që mund të ndodhin gjatë prodhimit të vaksinave,” tha ajo në një intervistë me gjermanen Sueddeutsche Zeitung.
Duke iu përgjigjur kritikave në rritje se BE ishte shumë i pavendosur në prokurimin e vaksinave, Von der Leyen tha se “një vend mund të jetë një skaf i shpejtë, ndërsa BE është më shumë një lloj anije ngarkese”.
“Ne u përqendruam shumë në pyetjen nëse do të ketë vaksina, domethënë në zhvillimin e saj,” vuri në dukje ajo.
Nga perspektiva e sotme, sipas saj, ishte e nevojshme të mendohej paralelisht për sfidat e prodhimit masiv.
“Duhet t’u ishte shpjeguar njerëzve se gjithçka po përparon, por ngadalë, dhe se mund të ketë probleme dhe vonesa në këtë procedurë krejtësisht të re. Sidoqoftë, ne i nënvlerësuam ndërlikimet që mund të ndodhnin”, shpjegoi ajo.
Ajo kujtoi se KE kishte porositur deri në 2.3 miliardë doza vaksinash nga një total prej gjashtë prodhuesve për 27 nga anëtarët e saj.
Aktualisht, kompanitë po japin më pak sesa pritej ose premtohej.
Në ndërkohë, thotë ajo, drejtimi është i mirë për sa i përket numrave të dërgesave.
Von der Leyen theksoi se qeveritë e të gjitha 27 vendeve anëtare ishin të përfshira nga afër në negociatat me kompanitë farmaceutike.
“Në Evropë, ne kemi ambicien që 70 përqind e popullatës së rritur të vaksinohen para fundit të verës”, tha ajo në një intervistë me disa media.
Ajo shtoi se “me siguri do të ketë pengesa të tjera, probleme të tjera në prodhim” dhe paralajmëroi se BE duhet të jetë e gatshme për një mungesë të mundshme të lëndëve të para dhe përbërësve të caktuar të vaksinës.
Komisioni Evropian, i cili negocioi në emër të anëtarëve të BE, është kritikuar për vonimin e shpërndarjes së vaksinave të miratuara, sepse kanë lindur probleme me prodhimin në Evropë.
Von der Leyen përjashtoi çdo krahasim me Mbretërinë e Bashkuar dhe Izraelin, ku vaksinimi i qytetarëve ka përparuar shumë.
“Mbretëria e Bashkuar ka zgjedhur rrugën e aprovimit emergjent për vendosjen e vaksinës në treg. Ne zgjodhëm rrugën e dytë, për të mundësuar kontroll të plotë të vaksinës,” tha ajo.
Izraeli është “shumë i dixhitalizuar” dhe kompanive u jepen të dhëna personale të shëndetit dhe “ne nuk do të donim ta bënim atë në BE”, tha presidentja e KE. /tesheshi.com/
