Anëtarët e BE mund të kufizojnë ose përjashtojnë furnizuesit me rrezik të lartë të pajisjeve 5G nga pjesët kryesore të rrjeteve të tyre telekomunikuese, thuhet në një dokument udhëzues të BE-së, i cili sipas Reuters, do mund t’i japë një goditje të mundshme Huawei Technologies të Kinës.
Rekomandimet jo detyruese të përshkruara në dokumentin e BE-së, janë pjesë e një pakete masash për të adresuar rreziqet e sigurisë kibernetike në nivele kombëtare e më tej, në atë europiane.
Dokumenti udhëzues paralajmëron rrezikun e ndërhyrjes nga një vend i tretë në zinxhirin e furnizimit 5G, si dhe për rrezikun e varësisë nga vetëm një furnizues, për të justifikuar marrjen e një linje kaq të fortë.
Vendet e BE-së duhet të vlerësojnë profilet e rrezikut të furnitorëve në nivel kombëtar ose europian dhe të imponojnë kufizime për furnizuesit me rrezik të lartë, përfshirë dhe përjashtimet e nevojshme – thuhet në dokument.
Udhëzimet gjithashtu këshillojnë vendet e BE-së që të krijojnë një kornizë ligjore ose rregullatore për të kontrolluar burimin e jashtëm të furnizuesve dhe qasjen e tyre në pjesët kryesore të ndjeshme të infrastrukturës telekomunikuese.
Qeveritë e BE-së gjithashtu duhet të auditojnë operatorët e telekomit për t’u kërkuar atyre të japin informacion të detajuar në lidhje me blerjen e pajisjeve 5G dhe të përshkruajnë se si ata zbatojnë masat themelore teknike për sigurinë e rrjetit, thuhet në dokument.
Shefi i Ekonomisë Dixhitale të BE, Margrethe Vestager pritet të njoftojë më 29 janar se çfarë hapash duhet të merren në këtë drejtim.
Por nga ana tjetër, Blloku Evropian e konsideron rrjetin 5G si thelbësor për rritjen ekonomike.
Edhe pse asnjë kompani apo shtet nuk përmendet specifikisht në udhëzime, ato u bënë pasi vendet evropiane u përballën me presionin e Shteteve të Bashkuara për të ndaluar pajisjet e Huawei-it me shqetësimin e pretenduar se Kina mund ta përdorë atë për spiunazh.
Huawei, e cila garon në këtë fushë me Nokia dhe Ericsson të Suedisë, mohoi kategorikisht që pajisjet mund t’i përdor për spiunazh.
Huawei ka marrë mbështetje nga ndërmarrjet evropiane të telekomunikacionit, përfshirë Deutsche Telekom, Vodafone dhe Telefonica, ku të gjitha janë klientët e Huawei-t. /tesheshi.com/
