Bashkimi Evropian vendosi të hënën sanksione ndaj grupit paraushtarak të Rusisë – Wagner, i dyshuar për lidhje të ngushta me Kremlinin dhe anëtarët e të cilit kanë qenë të përfshirë në një sërë pikash krizash në mbarë botën.
Grupi Wagner ka rekrutuar, trajnuar dhe dërguar mercenarë në pikat e krizës në mbarë botën, duke përfshirë Libinë, Sirinë, Donbasin në Ukrainë, Republikën e Afrikës Qendrore, ku ata kanë shkelur rëndë të drejtat e njeriut, tha BE në një deklaratë.
Sanksionet u vendosën kundër vetë grupit Wagner, tetë individëve dhe tre personave juridikë të lidhur me të.
“Vendimi i sotëm synon të frenojë aktivitetet subversive të Wagner-it dhe të sinjalizojë vendosmërinë e fortë të BE-së për të mbrojtur interesat dhe vlerat e saj në fqinjësinë e saj dhe më gjerë, dhe për të ndërmarrë veprime të prekshme kundër atyre që kërcënojnë paqen dhe sigurinë ndërkombëtare dhe shkelin ligjin ndërkombëtar”. tha Këshilli i BE-së në një deklaratë.
Masat kufizuese të prezantuara janë rënë dakord në bazë të katër regjimeve të ndryshme të sanksioneve: regjimit global të sanksioneve të BE-së për të drejtat e njeriut dhe regjimit të sanksioneve në Libi dhe Siri, dhe minimin e integritetit territorial të Ukrainës.
Sanksionet përfshijnë ngrirjen e aseteve dhe ndalimin e udhëtimit në BE.
Sipas disa burimeve, grupi Wagner është një organizatë paraushtarake ruse ose kompani private e sigurisë, e drejtuar nga biznesmeni Yevgeny Prigogine, një bashkëpunëtor i ngushtë i presidentit rus Vladimir Putin. /tesheshi.com/
