Bashkimi Evropian, si ndërmjetës në dialogun mes Serbisë dhe Kosovës, do të bëjë gjithçka në mënyrë që në vitin e ardhshëm, deri në fund të mandatit të diplomates kryesore, Federica Mogherini, të arrihet një marrëveshje mbi një normalizim të plotë të marrëdhënieve mes dy vendeve.
Është Tanjug që citon burime nga Brukseli sipas së cilave në vitin e ardhshëm do bëhen të gjitha përpjekjet për normalizim të plotë të marrëdhënieve.
Nga Brukseli thuhet se ka “kontakte të vazhdueshme”, me qëllim të vazhdimit të dialogut në mes të Serbisë dhe Kosovës, por se nuk ka ende asnjë datë konkrete për një takim të mundshëm të presidentëve të Serbisë dhe Kosovës, Aleksandar Vuçiç dhe Hashim Thaçi.
Në qarqet e afërta me procesin e negociatave është gjykuar se takimi i javës së kaluar mes Vuçiçit e Thaçir ishte “pa dyshim e vështirë”, komenton Tanjug.
Është pohuar se plani i Federica Mogherinit në atë takim ishte që të arrihet një pakt për intensifikimin e procesit të arritjes së marrëveshjes mbi normalizimin gjithëpërfshirës të marrëdhënieve, por se vendimi i Kosovës për të rritur tarifat doganore për mallrat e importuara nga Serbia e trazoi dialogun.
Pyetur nga Tanjug se çfarë do të bëjë BE-ja që Kosova të tërhiqet nga një vendim të tillë, burime nga Komisioni Evropian kanë theksuar se BE-ja ka qenë e qartë në deklaratën e saj kur dënoi këtë veprim dhe u bëri thirrje autoriteteve të Kosovës që të revokojë vendimin për të rritur taksat me 10 përqind të importit të mallrave nga Serbia dhe Bosnja. /tesheshi.com/
