Komisioni Evropian do të hapë procedura formale kundër platformës kineze të shitjeve në internet Temu për të hetuar nëse ajo shkel rregullat për të luftuar shitjen e produkteve të paligjshme, raporton Bloomberg, duke cituar burime anonime të informuara.
Hetimi do të përcaktojë gjithashtu nëse Temu ka shkelur Aktin Evropian të Shërbimeve Dixhitale (DSA), shton agjencia e New York-ut.
BE-ja kërkon që Temu t’u japë atyre të dhëna për hapat e ndërmarrë kundër shitjeve të paligjshme
Pas një hetimi zyrtar nga Komisioni, Temu ka të drejtë të propozojë miratimin e kundërmasave për të adresuar shqetësimet e Komisionit Evropian dhe për të shmangur kështu gjobat e mundshme të larta.
Shqetësimet e Bashkimit Evropian
Hetimi pasoi kërkesën e Komisionit më 11 tetor që Temu të zbulonte se çfarë po bën për të luftuar shitjen e produkteve të falsifikuara ose të pasigurta në platformën online.
Komisioni Evropian tha në atë kohë se kishte kërkuar “informacion të detajuar dhe dokumente të brendshme mbi masat zbutëse të marra kundër pranisë dhe rishfaqjes së tregtarëve që shesin produkte të paligjshme në platformën Temu”.
Informacioni që Temu i ka dërguar deri tani Komisionit ka qenë i pakënaqshëm dhe nuk ka zbutur shqetësimet e Bashkimit Europian, shtuan burime anonime. /tesheshi.com/
