Bashkimi Europian pret që Beogradi të zbatojë zotimet për respektimin e të drejtave të pakicave sipas detyrimeve ndërkombëtare. Komenti i Maja Kocijançiç i referohet themelimit të Asocacionit të komunave shqiptare në Serbi, shpallur pak ditë më parë. Sipas saj, nuk ka ngjashmëri me Asocacionin e komunave serbe në Kosovë, që “është rezultat i negociatave shumë specifike në kuadër të dialogut Kosovë- Serbi për normalizimin e marrëdhënieve midis dy vendeve”.
“Kur bëhet fjalë për pakicën shqiptare në Serbi, Serbia ka zotuar vetveten për të zbatuar një politikë mbi pakicat kombëtare, në një linjë me të gjitha detyrimet ndërkombëtare që dalin nga korniza e Konventës së Këshillit të Evropës për mbrojtjen e pakicave kombëtare dhe nga Karta Evropiane për pakicat. Presim përmbushjen e këtyre detyrimeve”, u ka thënë gazetarëve, Kocijançiç, zëdhënëse e përafqësueses së lartë të BE-së, Federica Mogherini.
Përfaqësuesit politikë të Preshevës, Medvegjës dhe Bujanovcit votuan më 12 shtator themelimin e Asociacionit të komunave me shumicë shqiptare, si kundërpërgjigje ndaj marrëveshjes së arritur më 25 Gusht në Bruksel, për themelimin e asocacionit të komunave me shumicë serbe në Kosovë. /tesheshi.com/
