Të martën, në një takim në Luksemburg, ministrat e shëndetësisë të vendeve anëtare të Bashkimit Evropian miratuan një rekomandim me të cilin kërkojnë të inkurajojnë një konsum më të ulët të barnave antimikrobiale, ndër të tjera, një ulje të konsumit të antibiotikëve me 20 për qind deri në vitin 2030.
“Ne nuk mund të injorojmë kërcënimin vdekjeprurës që paraqesin për shëndetin e njeriut mikroorganizmat rezistente ndaj ilaçeve. Lufta kundër rezistencës antimikrobike ka qenë një prioritet kyç i Presidencës suedeze dhe rekomandimi i sotëm u ofron vendeve të BE-së mjete për të monitoruar dhe reduktuar konsumin e antimikrobikëve”, tha Jakob Forssmed, Ministër Suedez për Çështjet Sociale dhe Shëndetin Publik.
Shëndeti është kompetencë ekskluzive e shteteve anëtare, prandaj Këshilli i BE-së nuk mund të bëjë rregullore detyruese por rekomandime që shtetet anëtare mund t’i zbatojnë në baza vullnetare.
Përdorimi i pakontrolluar
Rekomandimi synon parandalimin dhe kontrollin e infeksioneve, mbikëqyrjen dhe monitorimin, inovacionin dhe disponueshmërinë e antimikrobikëve efektivë, përdorimin e kujdesshëm dhe bashkëpunimin midis shteteve anëtare dhe në nivel global.
Në bashkëpunim me Qendrën Evropiane për Parandalimin dhe Kontrollin e Sëmundjeve (ECDC), rekomandimi përcakton disa objektiva të BE-së që duhet të përmbushen deri në vitin 2030.
Këto janë një reduktim prej 20 për qind në përdorimin total të antibiotikëve për njerëzit, përdorim efikas të antibiotikëve në mënyrë që të paktën 65 për qind e përdorimit total të antibiotikëve njerëzorë të jetë efektiv dhe një reduktim i infeksioneve me tre baktere kyçe rezistente ndaj antibiotikëve, kryesisht në spitale.
Antimikrobikët janë barna me rëndësi kritike. Megjithatë, për shkak të përdorimit të tepërt dhe keqpërdorimit të tyre gjatë viteve, rezistenca antimikrobike është rritur, që do të thotë se antimikrobikët po humbasin efektivitetin e tyre, duke e bërë gjithnjë e më të vështirë ose të pamundur trajtimin e infeksioneve. /tesheshi.com/
